Morjim Beach: किनाऱ्यावर गार्डन उभारण्यास विरोध, नवीन पार्किंगलाही आक्षेप

मोरजी, ता. ३० (प्रतिनिधी) : टेंबवाडा येथील किनारी भागात सरकारमार्फत गार्डन उभारण्यास ग्रामसभेत विरोध दर्शविण्यात आला. या ठिकाणी नवी पार्किंग व्यवस्था करण्यासही ग्रामस्थांनी आक्षेप घेतला. तसेच चेंजिंग रूम इतरत्र हलवून नये व या ठिकाणी नवे रस्ताही उभारू नये, अशा सूचना करण्‍यात आल्‍या.

येथील डोंगर माळरानावरील सर्वे क्रमांक ११ मधील जागेत जोपर्यंत जमीनदार आणि जमिनी घेणाऱ्यांचे वाद संपुष्टात येत नाहीत, तोपर्यंत येथे कोणतेच परवाने देऊ नये, अशी जोरदार मागणी ग्रामसभेत करण्यात आली.

ही ग्रामसभा सरपंच मुकेश गडेकर यांच्या अध्यक्षतेखाली झाली. यावेळी पंच मंदार पोके, फटू शेटगावकर, सुरेखा शेट गावकर, विलास मोर्जे, रजनी शिरोडकर, स्वप्नील शेटगावकर, सुप्रिया पोके उपस्थित होत्‍या.

सरपंच गडेकर यांनी स्वागत केले. सचिव सचिन यांनी मागच्या सभेचा इतिवृत्तांत वाचून कायम केला.

यावेळी मयूर शेटगावकर यांनी तेंबवाडा येथील पार्किंग आणि गार्डन यासंदर्भातील प्रश्‍न उपस्थित करत पर्यावरणाची हानी करून पाहणाऱ्या अशा प्रकल्पांना थारा देणार नाही, असा इशारा देत यासंदर्भातील ठरावही मांडला. तसेच गावातील पाणीपुरवठ्यासंदर्भातही शेटगावकर यांनी प्रश्‍न उपस्थित केला.

कचरा व्यवस्थापन समितीची मासिक सभा का होत नाही, सभा झाल्यास किती महिने झालेत, निधी किती आहे, असे प्रश्‍न तुकाराम शेटगावकर यांनी यावेळी उपस्थित केले. तसेच रस्त्यावरील खड्डे, सील केलेले बेअरिंग, न्यूवाडा येथील पार्किंग आदी प्रश्‍न उपस्थित केले. सरपंच मुकेश गडेकर यांनी या प्रश्नांची उत्तरे देण्याचा प्रयत्न केला.

मेगा प्रकल्पांना परवाने नकोच

भाटीवाडा येथील ग्रामस्थांनी डोंगर माळरानावरील सर्वे नंबर ११ मधील जागेचा वाद संपुष्टात येत नाही, तोपर्यंत या जागेत मेगा प्रकल्पाला कोणतेच परवाने देऊ नयेत. या जागेत जाणाऱ्या वाटेवर जे फाटक लावले आहे, ते हटवावे. तसेच या ठिकाणी ११ केव्ही भूमिगत वीजवाहिनी घातलेली आहे. तीसुद्धा काढून टाकावी. नवीन बोअरवेल मारण्यास परवाने देऊ नयेत, अशी मागणी यावेळी केली.