'टीव्ही बघत होतो, कुत्रा भुंकायला लागला म्हणून खिडकीत आलो तोवर...'; गोव्यात 65 वर्षांच्या वृद्धावर गोळीबार

गोव्यातील मये येथून एक धक्कादायक आणि विचित्र घटना समोर आली आहे. 65 वर्षीय वृद्ध आपल्या पत्नीसोबत घरात टीव्ही पाहत असताना त्यांना घराच्या बाहेर वेगळा आवाज ऐकू आला, त्यात त्यांचा कुत्रा देखील भुंकायला लागला. आवजाची शाहनिशा करण्यासाठी वृद्धाने खिडकीचे दार उघडले आणि त्यांच्यासोबत जीवावर बेतणारा प्रसंग घडला.

याबाबत त्यांनी पोलिसांत तक्रार देखील दाखल केली असून, या तक्रारारीत त्यांनी त्यांच्यावर बेतलेल्या प्रसंगाची माहिती दिली आहे.

गेल्या गुरूवारी अजित शिवराम म्हांब्रे, आपली पत्नी आणि मुलीसोबत घरात टीव्ही पाहत बसले होते. दरम्यान, त्यांच्या घराबाहेर असणारा कुत्रा जोर जोरात भुंकायला लागला. कुत्रा का भुंकत आहे हे पाहण्यासाठी अजित यांनी शाहनिशा करण्याचे ठरवले. त्यांनी उठून खिडकीचे दार उघडले. आणि बंदुकीचा मोठा आवज झाला. बंदुकीतून सुटलेली गोळी म्हांब्रे यांच्या पोटात घुसली होती. आणि त्यातून रक्तस्त्राव व्हायला लागला होता.

म्हांब्रे गोळी लागलेली असताना जखमी अवस्थेत कोण आरोपी आहेत हे पाण्यासाठी बाहेर गेले. घराबाहेर दोन व्यक्ती होते, त्यापैकी एक मांद्रेकर असल्याचे म्हांब्रे यांना समजले. विशेष म्हणजे म्हांब्रे यांनी त्यांच्यावर गोळीबार झाला असून, झालेली जखम ते मांद्रेकर यांनाच दाखवत होते. दरम्यान, त्यानंतर तो पळून गेला असे म्हांब्रे यांनी पोलिसांना दिलेल्या माहितीत म्हटले आहे.

हा चित्तथरारक प्रसंग घटल्यानंतर घटनास्थळी रूग्णवाहिका पोहचण्यासाठी काही वेळ लागला. दरम्यान, खासगी वाहनातून म्हांब्रे गोमेकॉत दाखल झाले. रूग्णालयात डॉक्टरांनी म्हांब्रे यांच्यावर शस्त्रक्रिया करून, बंदुकीची गोळी बाहेर काढली.

याप्रकरणी डिचोली पोलिसांनी भारतीय दंड विधान कलम 336, 338 आणि आर्म अॅक्ट अंतर्गत गुन्हा दाखल केला आहे. गुन्हा दाखल झाल्याप्रमाणे डिचोली पोलिसांनी दोघांना अटक केली आहे. दोघानांही न्यायालयीन कोठडी सुनावण्यात आली आहे. आरोपींकडून शस्त्र जप्त करण्यात आले आहे.

दरम्यान, अनंत शिवदास मांद्रेकर यास दहा हजार रूपयांच्या मुचलक्यावर न्यायालयाने जामीन मंजूर केला आहे. तथापि, त्याला चौकशीसाठी तीन दिवस दुपारी अडीच ते पाच या वेळेत पोलिसांत हजेरी लावण्यास सांगण्यात आले आहे.