आधी ह्रदयविकाराचा झटका आणि अपघाताने घातला काळाचा घाला

पणजी: बांबोळी येथील महामार्गावर आज सकाळी ट्रक व रुग्णवाहिका यांच्यात झालेल्या भीषण अपघातामध्ये रुग्णवाहिकेतील रुग्ण प्रकाश नाईक (53) याचा मृत्यू झाला. नाईक यांना ह्रदयविकाराचा झटका आल्याने त्यांना गोमेकॉ इस्पितळात नेण्यात येत होते.

रुग्णवाहिका इस्पितळाकडे जात असताना समोरून आलेल्या ट्रकने रुग्णवाहिकेला वाट देण्याऐवजी समोरून धडक दिली. या अपघातात रुग्णवाहिकेत रुग्णासोबत असलेले विकास तळेकर (35 वर्षे, बेतकी) व रवी नाईक (45 वर्षे, कुंभारजुवे) हे जखमी झाले असून त्यांच्यावर उपचार सुरू आहे. या भीषण अपघातात रुग्णवाहिकेच्या दर्शनी भागाचा चक्काचूर झाला आहे. या अपघातप्रकरणी पोलिसांनी ट्रक चालकाविरुद्ध गुन्हा दाखल करून ताब्यात घेतले आहे.