Bondla Sanctuary: खुशखबर! गोव्यातील बोंडला प्राणी संग्रहालय आता पर्यटकांसाठी खुले; वनमंत्री राणेंनी दिली माहिती

पणजी: एप्रिल महिन्यात रानमांजराच्या पाच प्रजाती मरण पावल्या होत्या. त्यामुळे सावधगिरीचा उपाय म्हणून एप्रिल २०२५ पासून बंद ठेवलेले बोंडला प्राणी संग्रहालय आता पुन्हा पर्यटकांसाठी खुले केले आहे.

बुधवारपासून (२५ जून) हे प्राणी संग्रहालय पुन्हा खुले केले असून, नॅशनल इन्स्टिट्यूट ऑफ हाय सिक्युरिटी अ‍ॅनिमल डिजिजेस (निषाद), भोपाळ यांनी दिलेल्या नकारात्मक चाचणी अहवालानंतर हा निर्णय घेतल्याची माहिती वनमंत्री विश्वजीत राणे यांनी दिली.

गोवा वन विभागाने या कालावधीत जबाबदारीने कार्य केले. प्राणी आणि पर्यटकांचे आरोग्य सुरक्षित राहावे, यासाठी सर्व जैवसुरक्षा नियमांचे काटेकोर पालन करण्यात आले. संभाव्य पक्षी फ्लू संसर्गाचा संशय आल्याने खबरदारीचा उपाय म्हणून प्राणी संग्रहालय तात्पुरते बंद करण्यात आले होते.

वन विभागाने दिलेल्या माहितीनुसार, प्राणी, विशेषतः पक्ष्यांवर देखरेख ठेवून नमुने भोपाळच्या प्रयोगशाळेत तपासणीसाठी पाठवले होते. प्राप्त अहवालानुसार, कोणत्याही प्रकारचा संसर्ग आढळला नाही. त्यामुळे आता बोंडला पुन्हा पर्यटकांसाठी खुले केले आहे.