निवडून आल्‍यावर दिव्या राणे प्राधान्यांन 'हे' काम करणार

पर्ये मतदारसंघात सर्वांना रोजगार मिळवून देऊन त्यांचा सर्वांगीण विकास साधणे हे आपले मुख्य ध्येय आहे. त्याचबरोबर गोव्यातील सर्वांत उंच ठिकाण असलेल्या या मतदारसंघातील सुर्ल या गावाचे रुपांतर ‘हिल स्टेशन’मध्ये करून पर्येला पर्यटनकेंद्र बनवण्याचा आपला मानस आहे, असे पर्ये मतदारसंघातील भाजपच्या उमेदवार डॉ. दिव्या विश्‍‍वजीत राणे (Divya Rane) यांनी ‘गोमन्तक’ला दिलेल्या मुलाखतीत सांगितले.

विधानसभेवर जाण्यासाठी आपण हाच मतदारसंघ का निवडला?

मी निवडलेला हा मतदारसंघ पर्ये (PORIEM) व वाळपई या गावांचा एक भाग आहे. या सर्व टापूत आम्ही म्हणजे आमच्या कुटुंबाने गेल्या अनेक वर्षांपासून काम केले आहे. येथील लोकांशी गेल्या 50 वर्षांपासून आमचे अतिशय निकटचे संबंध आहेत. तर, माझे पती विश्‍वजीत राणे हे गेल्या 15 वर्षांपासून आमदार, मंत्री या नात्याने काम करत आहेत. त्यांच्याबरोबरीने माझेही या लोकांशी स्‍नेहसंबंध निर्माण झाले आहेत आणि आता मीही समाजकारणातून सक्रिय राजकारणात येण्याची वेळ येऊन ठेपली आहे असे मला वाटले.

कारण विश्‍वजीत राणे यांच्याबरोबर या भागात वावरत असल्याने माझे येथील महिला, युवावर्ग यांच्याशी नाते निर्माण झाले. त्यातूनच त्यांचे जे विविध प्रश्‍न, मुद्दे आहेत ते विधानसभेत जाऊन सोडविण्याचा विचार पक्का झाला आणि साहजिकच हा मतदारसंघ (Constituency) निवडला.

तुमचे सासरे प्रतापसिंग राणे गेली 50 वर्षे या मतदारसंघाचे आमदार राहिले आणि मंत्री, मुख्यमंत्री अशी उच्च पदे त्यांनी भूषविली. त्याबद्दल काय सांगाल?

माझ्या सासऱ्यांनी गेल्या अनेक वर्षांपासून सत्तरीबरोबरच संपूर्ण गोव्यासाठी खूप कार्य केले आहे. मीसुद्धा त्यांच्याच पावलावर पाऊल ठेवून त्यांच्यासारखे काम करू इच्छिते. त्याच विचारातूनच समाजसेवेसाठी सक्रिय राजकारणात (Politics) उतरण्याचा निर्णय घेतला आहे. मतदारसंघातील युवक आणि महिला यांना पुढे आणून त्यांचा विकास साधणे हे माझे मुख्य ध्येय आहे. त्याच दृष्‍टिकोनातून मी माझी कारकीर्द पुढे नेणार आहे.

तुम्ही निवडून आल्‍यावर प्राधान्य काय राहील?

सत्तरी (Satari) तालुक्यात आज मुख्य मुद्दा आहे तो वाढत्या बेरोजगारीचा. तशी ही समस्या सर्वत्रच आहे. त्यामुळे ती सोडविण्याला माझे प्राधान्य राहणार आहे. त्या अनुषंगाने माझा गांभीर्यपूर्वक दृष्टिकोन आहे. वेर्णा येथे जसे विविध उद्योग, कारखाने आहेत तसेच येथेही आणावेत. त्याद्वारे येथील सुशिक्षित युवकांना रोजगार मिळवून देण्याचा विचार आहे. तसेच कमी शिकलेल्या महिलांनाही त्या कारखान्यांमध्ये त्यांच्या कुवतीनुसार रोजगाराच्‍या संधी मिळतील. सरकारी नोकऱ्या उपलब्ध करण्याचे काम आम्ही केले आहे.

येथील लघु धरणाचे काम पूर्ण करून शेती करणाऱ्या महिलांना उत्तेजन देणार आहे. तसेच स्वव्यवसाय करण्यासही मदत करणार आहे. पर्ये मतदारसंघ एक उत्तम पर्यटनकेंद्र बनविण्याचा विचार आहे. या मतदारसंघातील सुर्ल हे एक सुंदर असे हिल स्टेशन बनू शकते. त्यासाठी तेथे हॉटेल्स आणली जाऊ शकतात. तसेच अंजुणे धरणाचे सौंदर्यीकरण करून तेही पर्यटनाचे आकर्षण बनविले जाईल. यामुळे हा संपूर्ण परिसर बदलून जाणार आहे. येथील पंचायतींनाही त्याचा लाभ होणार आहे.

या निवडणुकीत तुमचे प्रमुख प्रतिस्पर्धी कोण आहेत असे तुम्हाला वाटते?

माझा प्रतिस्पर्धी कोण आहे त्याकडे मी पाहत नाही. माझा प्रतिस्पर्धी काय करतो तेही मी पाहत नाही. मी जे काय साध्य करणार आहे त्याबद्दल मला पूर्ण आत्मविश्‍वास आहे. युवक, महिला माझ्या संपर्कात आहेत व त्यांची संख्या आता दुप्पट झाली आहे. ते सर्वजण म्हणजे माझे कुटुंब आहे. तेच मला पुढे नेणार आहेत.

एक युवा उमेदवार म्हणून लोकांना तुमच्याबद्दल काय वाटते?

मी जेव्हा लोकांमध्ये मिसळते तेव्हा युवा, महिला आणि ज्येष्ठ असे सर्वजण मला आशीर्वाद देतात. त्यांच्याशी माझे भावनिक, आपुलकीचे संबंध आहेत. पुढे आमदार (MLA) म्हणून त्यांच्यासाठी चांगले काम करणार आहे. त्यांना माझ्याकडून अनेक अपेक्षा आहेत आणि त्यांच्या अपेक्षा मी पूर्ण करणार यावर त्यांचा विश्‍वास आहे.