Film Festival Goa : ‘ओड’ सर्वोत्तम लघुपट; चोरीला गेलेल्या किनाऱ्याची गोष्ट

Film Festival Goa : पणजी, गोव्यात दिवसेंदिवस आक्रसत चाललेल्या समुद्रकिनाऱ्याबाबत विचार करायला लावणाऱ्या आणि मनाची पकड घेणाऱ्या ‘ओड’ या लघुपटाने, ५४ इफ्फीमध्ये ‘७५ क्रिएटिव्ह माइंड्स ऑफ टुमॉरो’ उपक्रमात सर्वोत्तम लघुपटाचा पुरस्कार पटकावला आहे.

विजेत्यांचे अभिनंदन करताना, माहिती आणि प्रसारण मंत्रालयाचे सह सचिव (चित्रपट) आणि एनएफडीसीचे व्यवस्थापकीय संचालक पृथुल कुमार यांनी चित्रपट निर्मितीमध्ये खऱ्या आशयाची ओळख करून देण्याच्या महत्त्वावर प्रकाश टाकला. यामुळे भारताला जागतिक स्तरावर लौकिक वाढेल, असे त्यांनी सांगितले.

देशभरातील तरुण सर्जनशील व्यक्तींसाठी ‘क्रिएटिव्ह माइंड्स ऑफ टुमॉरो’, हे उत्तम व्यासपीठ असल्याचे त्यांनी नमूद केले.

या लघुपट स्पर्धेतील परीक्षक दिग्दर्शक शूजित सरकार म्हणाले, ‘द मिशन लाईफ’ या संकल्पनेवर ४८ तासांत लघुपट तयार करणे, आत्मपरीक्षण, आशा, निषेध अशा सर्व भावनांचा अनुभव हा महत्त्वाचा आहे.

सर्व लघुपट खरोखरच समर्पक, विचार करायला लावणारे आणि पर्यावरणाचे संरक्षण व संवर्धन या अत्यंत महत्त्वाच्या विषयाशी संबंधित होते. खरे तर, तुम्ही सर्वच जण विजेते आहात, असे त्यांनी ७५ युवकांना उद्देशून म्हटले.

केंद्रीय माहिती आणि प्रसारण मंत्री, अनुराग सिंग ठाकूर यांच्या संकल्पनेतून हा उपक्रम उदयाला आला आहे. फिल्म चॅलेंजचा एक भाग म्हणून, ''क्रिएटिव्ह माइंड्स ऑफ टुमॉरो'' सहभागींना पाच संघांमध्ये विभागण्यात आले होते.

त्यांनी ४८ तासात ‘मिशन लाइफ’ या संकल्पनेवर लघुपट तयार केले. शॉर्ट्स इंटरनॅशनलच्या सहकार्याने एनएफडीसीने या स्पर्धेची संकल्पना राबवली. स्पर्धेतील सहभागींनी नामवंतांच्या मास्टरक्लासनाही हजेरी लावली.

वाढती बांधकामे; किनाऱ्यांवर संक्रात !

''ओड'' मध्ये मच्छीमार समुदायातील मार्सलीन, आपली बोट ठेवण्यासाठी पार्किंगची जागा शोधण्याच्या प्रयत्नात बोट शहराच्या मध्यभागी घेऊन जातो.

समुद्रकिनारा चोरीला गेला आहे आणि त्याच्याकडे पार्क करण्यासाठी जागा शिल्लक नाही, अशी तक्रार तो करतो. समुद्राच्या पाण्याच्या पातळीत होणारी वाढ आणि समुद्रकिनाऱ्यांवर मोठ्या प्रमाणावर बांधकामे झाल्यामुळे गोव्याचा आक्रसता समुद्रकिनारा, या समस्येवर हा लघुपट आहे.