‘आदर्श मोरजी’साठी अद्याप कोणतीही कार्यवाही नाही!

मोरजी: पेडणे तालुक्यातील 199 पंचायातींमधून पंचायत संचानालयाकडून मोरजी गावाची ‘आदर्श गावा’साठी निवड झाली, परंतु अद्याप त्यादृष्टीने कोणतीही अंमलबजावणी होताना दिसत नाही. मोरजी आदर्श ग्राम करण्यासाठी सर्व ग्रामस्थ आणि विविध सामाजिक संस्था, महिला मंडळे, देवस्थान समित्या, सांस्कृतिक समित्या या सर्वांचे सहकार्य घेण्याचेही ठरले होते, परंतु कुठे माशी शिकली ते कळायला मार्ग नाही.

राज्यात एकूण पाच पंचायतींची पंचायत संचानालयाने ‘आदर्श ग्राम’साठी निवड केली होती. आदर्श ग्राम कसा करता येईल यासाठी अधिकारी आश्विनी आचार्य यांनी त्यावेळी पंचायत मंडळ, विविध समित्या, महिला मंडळे, जागृत नागरिक यांची एक विशेष सभा घेवून सविस्तर मार्गदर्शन केले होते. त्याची आजपर्यंत काहीच कार्यवाही झालेली नाही. ‘आदर्श ग्राम योजने’ अंतर्गत खासदार श्रीपाद नाईक यांनी 8 वर्षांपूर्वी इब्रामपूर गावाची आदर्श गाव म्हणून निवड केली, त्याच धर्तीवर आता पंचायत संचनालयाने एक एक गाव निवडून आदर्श गाव करण्याची योजना आखलेली आहे.

समित्या कार्यरत होणे आवश्यक: आदर्श ग्राम योजनेअंतर्गत गावातील ज्या विविध तीसच्या आसपास समित्या आहेत, त्या कार्यरत केल्या पाहिजे. प्रत्येक समितीची मासिक एक बैठक घेणे, चर्चा करणे, ग्रामसभेत महिलांचा सहभाग वाढवणे, गावातील वेगवेगळ्या समस्या ग्रामसभेसमोर आणणे आवश्यक असून ‘आदर्श ग्राम’साठी स्वयंसाहाय्य गटांच्या महिलांनी एकत्रित यावे, असे आवाहन अधिकारि आश्विनी आचार्य यांनी केले होते. त्याची आजपर्यंत कार्यवाही झालेली नाही.