Bhoma Highway: 'भोम'साठी गडकरींनी 557 कोटी मजूर केले पण..; स्थानिक संस्कृतीचा बळी नको, आलेमाव यांचा इशारा

Bhoma Highway Nitin Gadkari Approves Rs 557 crore For Road Widening

पणजी/फोंडा: भोम येथे असलेला राष्ट्रीय महामार्ग चौपदरी करणार की, त्या ठिकाणचा रस्ता उड्डाण पूल स्वरूपात बांधणार, याविषयी संभ्रम कायम आहे. राज्याच्या सार्वजनिक बांधकाम खात्यालाही केंद्रीय महामार्ग मंत्रालयाने नेमका कोणत्या प्रस्तावाला मंजुरी दिली आहे, याची माहिती नाही.

केंद्रीय महामार्गमंत्री नितीन गडकरी यांनी भोम येथील महामार्ग रुंदीकरणासाठी ५५७ कोटी रुपये मंजूर केल्याची माहिती ‘एक्स’वर दिली होती. त्यानंतर याविषयी चर्चा सुरू झाली आहे. भोम येथील रस्ता रुंदीकरणाला स्थानिकांचा विरोध आहे. एका बाजूला मंदिर

तर दुसरीकडे दुकाने असा चिंचोळा टापू भोम येथे आहे. येथे रस्ता रुंदीकरणाला स्थानिकांचा विरोध आहे

भोम येथील राष्ट्रीय महामार्ग प्रकल्पांतर्गत रस्त्याचे काम केले जाणार आहे. ९.६ किलोमीटरचा हा टापू या प्रकल्पांतर्गत रुंद केला जाणार आहे. मात्र, रुंदीकरण केला जाणारा रस्ता कुठला, हे अद्याप गुलदस्त्यात आहे.

यापूर्वी दक्षिण गोव्याचे खासदार कॅ. विरियातो फर्नांडिस यांनी केंद्रीय रस्ते वाहतूकमंत्री नितीन गडकरी यांची भेट घेऊन रस्ता रुंदीकरण न करता बगल मार्ग बांधता येतो का याचा विचार करावा, अशी विनंती केली होती. खासदार आंदोलनातही सहभागी झाले होते. त्यामुळे आता सरकारने कोणता निर्णय घेतला आहे, याकडे त्यांचेही लक्ष आहे.

विरोधी पक्षनेते युरी आलेमाव यांनी, रस्ता रुंदीकरणात मंदिर आणि स्थानिक संस्कृतीचा बळी दिला जाऊ नये, असा इशारा गडकरी यांच्या घोषणेनंतर लगेच दिला आहे.

याबाबत सार्वजनिक बांधकाम खात्याचे प्रधान मुख्य अभियंता उत्तम पार्सेकर यांच्याशी संपर्क साधला असता ते म्हणाले, केंद्रीय मंत्रालयाकडून मंजुरीची कागदपत्रे अद्याप मिळालेली नाहीत. त्यामुळे असलेलाच रस्ता रुंद केला जाणार की, उड्डाण पुलावरून रस्ता नेला जाणार याविषयी आताच काही सांगणे शक्य नाही.