Netravali: कदंबच्या 'त्या' कर्मचाऱ्यांवर कडक कारवाई करणार : वनमंत्री राणे

Netravali Wildlife: नेत्रावळी अभयारण्यातील साळजिणी येथे शिकारीच्या संशयावरुन वन खात्याने अटक केलेल्या कदंब महामंडळाच्या सोळाही कर्मचाऱ्यांवर कडक कारवाईचे आपण निर्देश दिल्याचे वनमंत्री विश्वजीत राणे यांनी म्हटले आहे.

दुसरीकडे, हा गुन्हा खासगी स्वरूपाचा आहे. त्यामुळे महामंडळामार्फत त्यांच्यावर तत्काळ कारवाई करता येणार नाही. वन खात्याकडून आम्हाला कारवाईबाबत अजून कोणताही प्रस्ताव आलेला नाही, असे महामंडळाचे व्यवस्थापकीय संचालक डॅरेक नेटो यांनी स्पष्ट केले.

दरम्यान, या कर्मचाऱ्यांना (Employees) न्यायालयाने जामीन मंजूर केला आहे. या सोळाही जणांना पुढील पाच दिवस चौकशीसाठी हजर राहण्याचे निर्देश देण्यात आले आहेत.

साळजिणी येथे शिकार करून पार्टी करण्यासाठी गेल्याच्या संशयावरून वन खात्याच्या कर्मचाऱ्यांनी कदंब महामंडळाच्या सांगे भागातील चालक, वाहक अशा मिळून सोळा कदंब कर्मचाऱ्यांना शनिवारी रात्री ताब्यात घेतले. त्यांच्याकडून पाच काडतुसांसह कोयते, कुऱ्हाड आणि जेवण बनवण्यासाठी लागणारे टोप, ताट आदी साहित्यही जप्त करण्यात आले.

ताब्यात घेतल्यानंतर रात्री उशिरा या सर्वांना नेत्रावळी वन्यजीव विभागाच्या कार्यालयात आणून त्यांच्याविरोधात वन्यजीव रक्षण कायद्याअंतर्गत गुन्हा नोंद करण्यात आला. तसेच सर्वांना अटक करण्यात आली. सोमवारी त्यांना न्यायालयाने (Court) जामीन मंजूर करत पुढील पाच दिवस चौकशीसाठी उपस्थित राहण्याचे निर्देश दिले आहेत.