राष्ट्रवादी नेते प्रफुल्ल पटेल दोन दिवसांच्या गोवा दौऱ्यावर

वास्को: राष्ट्रवादी काँग्रेसचे राष्ट्रीय सचिव आणि माजी विमान वाहतूक मंत्री श्री प्रफुल्ल पटेल यांचे आज दुपारी 3 वाजता गोवा दाबोळी विमानतळावर आगमन झाले. दुपारी दाबोळी विमानतळावर आगमन होताच त्यांचे स्वागत राष्ट्रवादी काँग्रेसचे गोवा प्रदेश अध्यक्ष फिलिप डिसोझा यांनी केले. यावेळी त्यांच्या समवेत राष्ट्रवादी काँग्रेसचे गोवा सचिव प्रितम नाईक व इतर कार्यकर्ते उपस्थित होते. (NCP Goa Latest News)

यावेळी फिलिप डिसोझा यांनी सांगितले की, प्रफुल्ल पटेल दोन दिवसांच्या गोवा भेटीवर आले असून ते आज व उद्या महत्वाचे निर्णय घेऊन निवडणुकीची शेवटची यादी जाहीर करणार असल्याचे ते म्हणाले. दाबोळी मतदार संघाविषयी विचारले असता फिलिप डिसोझा म्हणाले, राष्ट्रवादी काँग्रेस पक्ष हा पर्याय म्हणून दाबोळीतील मतदारांनी निवडला आहे. मी दारोदार केलेल्या प्रचारात हे सिद्ध झाले आहे. मी 2002 साली याच पक्षाच्या चिन्हावर निवडणूक लढविली होती. मतदारांनी मला निवडून आणले होते. आता तिचं पुनरावृत्ती परत होणार असल्याचे ते शेवटी म्हणाले.