Group Dance Competition : पिसुर्ले, होंडा येथे गेल्या पन्नास वर्षांपूर्वी स्थापन करण्यात आलेल्या श्री महालक्ष्मी शिक्षण संस्थेच्या सुवर्णमहोत्सवी वर्षानिमित्ताने ८ जानेवारी २०२४ रोजी सायंकाळी ४.३० वाजता राष्ट्रीय पातळीवरील समूह नृत्य स्पर्धेचे आयोजन करण्यात आले आहे.
हा कार्यक्रम यशस्वी करण्यासाठी विविध समित्या स्थापन करण्यात आल्या असल्याची माहिती शिक्षण संस्थेचे अध्यक्ष विश्वजीत कृष्णराव राणे यांनी सालेली येथे बुधवार, २७ रोजी पत्रकार परिषदेत दिली.
यावेळी अध्यक्ष राणे यांनी सांगितले की, संस्थेच्या सुवर्णमहोत्सवी वर्षानिमित्त राष्ट्रीय पातळीवरील समूह नृत्य स्पर्धेचे आयोजन करण्यात आले आहे. यासाठी भरघोस अशी बक्षिसे ठेवण्यात आली आहेत. यामध्ये प्रथम बक्षीस रोख रुपये ४० हजार, द्वितीय ३० हजार, तृतीय २० हजार, चौथे व पाचवे प्रत्येकी १० हजार रुपये तसेच प्रमाणपत्र व चषक देण्यात येणार आहे.
या स्पर्धेसाठी १२ ते ३० पर्यंतच्या वयोगटातील युवक-युवतींना सहभागी होता येणार आहे. नृत्य कोणत्याही भाषेत सादर करवे, यासाठी वेळमर्यादा ८ मिनिटे, कमीत कमी १२ जणांचा सहभाग असणे गरजेचे आहे. या स्पर्धेत फक्त २० गटांना सहभागी करून घेण्यात येणार आहे.
मान्यवरांना आमंत्रण
यानिमित्ताने सुवर्णमहोत्सवी वर्ष उद्‌घाटन कार्यक्रमाला राज्यपाल पी.एस. श्रीधरन पिल्लई, मुख्यमंत्री डॉ. प्रमोद सावंत, तसेच पर्येच्या आमदार डॉ. दिव्या राणे यांना आमंत्रित करण्यात आले आहे.
हा कार्यक्रम होंडा-पोस्तवाडा येथील होंडा माध्यमिक विद्यालयाच्या प्रांगणात होणार आहे, अशी माहिती संस्थेचे अध्यक्ष राणे यांनी दिली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
