Narkasur in Goa: नरकासुर स्पर्धेत राडा! काणकोणात मिरवणुकीच्या रस्त्यावरून दोन गट भिडले; जोरदार हाणामारी

काणकोण: गोव्यातील दिवाळी उत्सवाचा उत्साह शिगेला पोहोचलेला असताना, काणकोण तालुक्यातील माशे येथे आयोजित नरकासुर स्पर्धेत मिरवणुकीच्या मार्गावरून दोन गटांमध्ये जोरदार हाणामारी झाल्याची घटना घडली आहे. या वादानंतर पोलिसांनी त्वरित हस्तक्षेप करत दोन सहभागींना ताब्यात घेतले.

नरकासुराच्या मिरवणुकीत वाद

मिळालेल्या माहितीनुसार, नरकचतुर्दशीच्या निमित्ताने आयोजित नरकासुर मिरवणुकीच्या मार्गावरून पुढे जाण्यावरून सहभागींमध्ये वाद झाला, ज्याचे रूपांतर हाणामारीत झाले. परिस्थिती चिघळत असल्याचे पाहून पोलिसांनी तातडीने घटनास्थळी धाव घेतली आणि परिस्थिती नियंत्रणात आणली.या प्रकरणी लोलीये येथील रॉनी फर्नांडिस आणि पैंगिण येथील राजेंद्र चारी या दोन सहभागींना पोलिसांनी ताब्यात घेतले. त्यांच्यावर कारवाई करण्यात आली.

पोलिसांनी या दोन्ही व्यक्तींना दंडाधिकाऱ्यांसमोर हजर केले. न्यायालयाने त्यांची बाजू ऐकून घेतल्यानंतर, त्यांना जामानावर सोडण्यात आले आहे. नरकासुर स्पर्धेच्या उत्साहादरम्यान झालेल्या या वादानंतर स्थानिक प्रशासनाने पुन्हा एकदा आयोजकांना शांतता आणि नियम पाळण्याचे आवाहन केले आहे.

गोव्यातील नरकासुर म्हणजे काय?

संपूर्ण गोव्यात दिवाळीच्या काळात जर सर्वाधिक उत्साह कशाचा असतो, तर तो म्हणजे नरकचतुर्दशीच्या दिवशी साजऱ्या होणाऱ्या नरकासुर दहनाचा. वाड्यांवर, घराघरांमध्ये आणि सार्वजनिक ठिकाणीसुद्धा नरकासुराचे दहन केले जाते, तसेच ठिकठिकाणी स्पर्धा आणि भव्य मिरवणुकांचे आयोजन केले जाते.