सासष्टी: केंद्रीय मंत्री नितीन गडकरी यांनी बेतूल मध्ये बंदर येणार नाही व ते महाराष्ट्रात हलविले जाईल, असे सांगूनही मुरगाव बंदर प्राधिकरणाने या प्रस्तावित बंदर उभारण्यासाठी हालचाली सुरू केल्या आहेत त्याचा नाकेरी बेतूल पंचायतीने निषेध केला.
या बंदराला आमचा विरोध आहे, असे नाकेरी बेतुलचे उपसरपंच दामोस्को डिसिल्वा यांनी केपेचे आमदार एल्टन डिकॉस्ता, सरपंच प्रितम देऊलकर व इतर पंच सदस्यांच्या उपस्थितीत मडगावात घेतलेल्या पत्रकार परिषदेत स्पष्ट केले.
दामोस्को डिसिल्वा यांनी सांगितले की, जर हे बंदर इथे उभारण्यात आले तर त्याचा परिणाम मच्छिमारी उद्योगावर होणार आहे. शिवाय पर्यटनाला धक्का बसणार आहे. बेतूल, नाकेरी, खणगिणी, केळशी सारख्या निसर्गरम्य अशा पर्यावरणाची वाट लागेल. पंचायतीतर्फे या बंदराला ना हरकत दाखला देण्यात आला नाही. किंवा मुरगाव बंदर प्राधिकरण व सरकारने या संदर्भात पंचायतीकडे संपर्क साधलेला नाही, अशी माहिती त्यांनी दिली.
जर बंदर सुरु झाले व कोळसा, तेल वाहतुक सुरू झाली या भागात स्थलांतरितांचा आकडा वाढेल. प्रदूषण वाढणार याची भीती आम्हाला आहे. आमच्या जीवनावर विपरित परिणाम होण्याची भीतीही आम्हाला आहे, असे त्यांनी सांगितले.
पुढील आठवड्यात आपण नाकेरी बेतुल पंचायतीच्या सदस्यांसमवेत मुख्यमंत्र्यांची भेट घेऊन त्यांना बेतूल येथील प्रस्तावित बंदराला विरोध का होत आहे, याबद्दल सविस्तर चर्चा करणार आहे असेही आमदार डिकॉस्ता यांनी सांगितले. येथील छत्रपती शिवाजी महाराजांचा किल्ल्याचे नूतनीकरण व सौंदर्यीकरण करण्याची मागणी केली. जर बंदर उभारण्यात आले तर हा किल्ला सुद्धा नष्ट होण्याची भीतीही त्यांनी व्यक्त केली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.