Mulgao: मुळगाव खाणप्रश्नी बैठक निष्फळ! कंपनीचा सरकारकडे अंगुलीनिर्देश; सर्वसाधारण बैठकीत पुढील भूमिका स्पष्ट होणार

डिचोली: खाण लीज क्षेत्रप्रकरणी कंपनीने सरकारकडे अंगुलीनिर्देश केल्याने मुळगाव येथील खाणप्रश्नी आज पणजी येथे झालेली बैठक निष्फळ ठरली. या बैठकीत कोणताही महत्त्वाचा निर्णय होऊ शकला नाही, अशी माहिती मिळाली. त्यामुळे खाणप्रश्नी निर्माण झालेला गुंता अद्याप कायम आहे.

मात्र, येत्या शनिवारी (ता. २२) सर्वसाधारण बैठक घेऊनच पुढील भूमिका स्पष्ट करण्याचा निर्णय मुळगाव पंचायतीसह विविध ग्रामसंस्थांनी घेतला आहे, तशी माहितीही मुळगाव कोमुनिदादचे अध्यक्ष महेश्वर परब आणि देवस्थानचे वसंत गाड यांनी दिली. तर मुळगावच्या लोकांच्या हिताचा विचार करूनच गावातील प्रश्न सोडविण्यासाठी कंपनीकडून प्रयत्न सुरू आहेत, असे ‘वेदांता’चे वरिष्ठ अधिकारी धीरजकुमार जगदीश यांनी सांगितले.

मुळगाव खाणप्रश्नी तोडगा काढण्यासाठी आज (मंगळवारी) पणजी येथे उत्तर गोवा जिल्हाधिकारी कार्यालयात जिल्हाधिकारी स्नेहा गीते यांच्या मार्गदर्शनाखाली एक संयुक्त बैठक आयोजित केली होती. या बैठकीस आमदार डॉ. चंद्रकांत शेट्ये यांच्यासह डिचोलीचे उपजिल्हाधिकारी खोर्जुवेकर, मामलेदार गावस, खाण आणि भूगर्भ खात्यासह प्रदूषण नियंत्रण मंडळाचे प्रतिनिधी तसेच मुळगाव पंचायत मंडळासह कोमुनिदाद, शेतकरी, आदी ग्रामसंस्थांचे पदाधिकारी आणि ‘वेदांता’चे अधिकारी उपस्थित होते.

फेन्सिंगचा निर्णय अमान्य

दुसऱ्या बाजूने घरांपासून ५० मीटर अंतरावर फेन्सिंग करण्याचा कंपनीचा निर्णय मुळगावच्या प्रतिनिधींना मान्य नाही, अशी माहिती मिळाली आहे. त्यामुळे आजच्या बैठकीत कोणताही निर्णय होऊ शकला नाही. दोन महिन्यांपूर्वी मुळगाव येथे खाण प्रश्न तापला होता. मुळगावमधील लोकांच्या तीव्र विरोधामुळे गेल्या महिन्याहून अधिक काळापासून मुळगावमधील ‘वेदांता’ची खाण बंद आहे. अगोदर खाण लीज क्षेत्रातून गाव बाहेर काढा, ही मुळगाववासीयांची प्रमुख मागणी आहे.

कंपनीला दिला दुसरा पर्याय

खाण लीज क्षेत्रातून मंदिरांसह घरे-दारे, शेती-बागायती आणि नैसर्गिक जलस्रोत वगळावीत, अशी मागणी बैठकीत केली. मात्र, लीज क्षेत्राबाबत निर्णय घेण्याचा अधिकार सरकारला आहे, असे सांगून कंपनीने सरकारकडे बोट दाखविले. खाण लीज क्षेत्रातून घरे-दारे वगळत नसाल, तर २०२१ च्या आराखड्यातील बफर झोनप्रमाणे व्यवसाय करावा, असा पर्याय कंपनीसमोर ठेवला आहे.