Vijai Sardesai: मुरगावातील जनतेला लोटले कोळसा प्रदूषणाच्या खाईत!

मुरगाव तालुक्यातील लोकप्रतिनिधींनी येथील जनतेला कोळसा प्रदूषणाच्या खाईत लोटले आहे. मुरगाव पतन प्राधिकरण (एमपीए) जनतेच्या डोळ्यांत धूळफेक करत आहे. या भागात भाजप म्‍हणजे ‘भारतीय गॅम्बलिंग पार्टी’ बनल्याची टीका गोवा फॉरवर्ड पक्षाचे अध्यक्ष तथा आमदार विजय सरदेसाई यांनी केली.

वास्को येथे आयोजित ‘जनता दरबार’मध्‍ये लोकांच्‍या समस्‍या जाणून घेतल्‍यानंतर सरदेसाई यांनी सरकारवर निशाणा साधला. स्‍थानिक आमदार कोळसा प्रदूषणावर न बोलता फक्त हप्ता वसुली कशी करता येईल यावर अधिक भर देत आहे.

खारीवाडा-वास्को येथील मच्छीमार जेटीची अवस्था बिकट झाली आहे. येत्या पावसाळी अधिवेशनात मुरगाव तालुक्यातील सर्व समस्यांवर प्रश्‍‍न उपस्थित करणार आहे, असे ते म्‍हणाले.

दरम्‍यान, वास्को येथील ‘झेड स्क्वेर’ सभागृहात आयोजित या ‘जनता दरबार’मध्‍ये चारही तालुक्यांतील जनतेने आपल्या समस्या मांडल्या. यावेळी गोवा राष्ट्रवादी काँग्रेस पक्षाचे अध्यक्ष तथा माजी महसूलमंत्री जुझे फिलिप डिसोझा, गोवा फॉरवर्डचे पदाधिकारी दुर्गादास कामत, चिखलीचे माजी सरपंच सॅबी परेरा, माजी सरपंच राहुल डिकॉस्‍टा व पदाधिकारी उपस्थित होते.