गोव्याची सुरक्षा ऐरणीवर, निम्म्याहून अधिक सीसीटीव्ही बंद

मडगाव : गोव्यात सरकारने कित्येक मोक्याच्या ठिकाणी लोकांच्या सुरक्षेसाठी सीसीटीव्ही कॅमेरे बसवले असले तरी त्यातील निम्म्याहून अधिक कॅमेरे बंद अवस्थेतच आहेत अशी माहिती खुद्द पोलीस (police) महासंचालक इंद्रदेव शुक्ला यांनी दिली.

आज त्यांच्या हस्ते वेर्णा औद्योगिक वसाहती जवळ हमरस्त्यावर सीसीटीव्ही कॅमेरे बसवण्यात आले आहेत. शुक्ला यांनी त्यांचे आज उद्घाटन केले. यावेळी बोलताना ते म्हणाले, गोव्यात सीसीटीव्ही कॅमेऱ्या बाबत थोडीशी उदासीन स्थिती आहे. सरकारतर्फे (Government) मोक्याच्या अशा 350 ठिकाणी असे कॅमेरे बसविण्यात आले आहेत पण त्यांच्या पुरेशा देखभाली अभावी ते बंद अवस्थेतच आहेत.

वेर्णा औद्योगिक वसाहत उद्योजक संघटने तर्फे हमरस्त्यावर 54 कॅमेरे स्वखर्चाने बसवले आहेत. शुक्ला यानी या उपक्रमाचे स्वागत करताना आता खासगी आस्थापनेनीही अशी सुरक्षा यंत्रणा उभारण्यासाठी पुढाकार घ्यावा असे आवाहन केले.

हमरस्त्यावर असलेल्या कित्येक घरात अशी सीसीटीव्ही कॅमेरा यंत्रणा बसवली आहे. मात्र घराबाहेर ते बसवले नाहीत. अशा घरमलकांनी आपल्या घराबाहेरही एक कॅमेरा बसवावा. त्यामुळे जर त्या परिसरात चोरी सारखे प्रकार झाले. आणि लावलेल्या कॅमेऱ्यावर त्या चोरट्यांची छबी दिसली तर तो चोरटा पकडू जाऊ शकेल. अशाने गुन्हेगारीवरही नियंत्रण येण्यास मदत होईल असे मत शुक्ला यांनी व्यक्त केले.