Mumbai Goa Highway Accident: मुंबई गोवा महामार्गावर लग्नाचे वऱ्हाड घेऊन जाणारा टेम्पो पलटी, 25 पेक्षा अधिकजण जखमी

Mumbai Goa Highway Accident: मुंबई गोवा महामार्गावर मोठा अपघात झाल्याची माहिती समोर आली आहे. लग्नाचे वऱ्हाड घेऊन जाणारा टेम्पो पलटी झाल्याने यात 25 पेक्षा अधिक प्रवासी जखमी झाले आहेत.

मुंबई गोवा महामार्गावर वागदे तेथील हॉटेल वक्रतुंडसमोर, टेम्पो देवगडच्या दिशेने जात असताना दुपारी दोनच्या सुमारास हा अपघात झाला.

मिळालेल्या माहितीनुसार, पिकअप टेम्पो देवगड पाडगावच्या दिशेने लग्नाचे वऱ्हाड घेऊन जात होता. दरम्यान, पिकअप चालकाने डिव्हायडरवर गाडी चढवल्याने महामार्गावर टेम्पो पलटी झाला. यात 25 पेक्षा अधिक प्रवासी जखमी झाले आहेत.

अनेकांच्या डोके, हाताला गंभीर दुखापत झाली असून जखमींना उपचारासाठी रूग्णालयात दाखल करण्यात आले आहे.

दरम्यान, मुंबई गोवा महामार्गावर अपघाताचे सत्र सुरूच आहे. महामार्गाचे मागील बारा वर्षांपासून काम रखडलं आहे. पुढील वर्षी मार्ग वाहतुकीसाठी खुला करण्यात येईल असे आश्वासन राज्यातील शिंदे-फडणवीस सरकारने दिले आहे. मात्र, महामार्गावरील अपघातांचे प्रमाण कमी करण्यासाठी प्रभावी उपाययोजना करण्याची आवश्यकता आहे.