Illegal Sand Mining: बेकायदेशीर रेती उपसा केल्याबद्दल सहाजण अटकेत; होडी जप्त

तारीर-वझरी येथे बेकायदेशीररित्या रेती उपसा केल्याच्या आरोपावरून मोपा पोलिसांनी सहा कामगारांना अटक केली. किनाऱ्यावर काढून ठेवण्यात आलेली दोन मीटर रेती व रेती काढण्यासाठी वापरण्यात येणारी होडीही पोलिसांनी ताब्यात घेतली. ही घटना बुधवारी (ता.१७) सायंकाळी घडली.

होडीचे मालक संजय परब यांच्यावर बेकायदेशीर रेती काढत असल्याचा गुन्हा नोंदविण्यात आला. किनाऱ्यावर काढून ठेवलेल्या दोन मीटर रेतीची किंमत ३ हजार रुपये इतकी आहे. मात्र, जप्त केलेली होडी अडीच लाखांची आहे.

बेकायदेशीर रेती उत्खनन आणि चोरीच्या संदर्भात गोवा दमण आणि दीव खनिज नियम १९८५ कलम ३, ३८ आरडब्ल्यू ६२ नुसार मोपा पोलिसांनी ही कारवाई केली आहे. अटक कारण्यात आलेले सर्व मजूर हे उत्तर प्रदेशातील वेगवेगळ्या भागातील आहेत. यामध्ये जीवत राजभर (६०, रा. बालियाबंदी, उत्तर प्रदेश), दिनेश राजभर (३६, सतवाज), अर्जुन कुमार राजभर (२४), अशोक राजभर (४५), शहांगूर राजभर (३५), फुलचंद राजभर (४५) यांचा समावेश आहे.

दरम्यान, पेडणे पोलिस स्थानकाचे जिवबा दळवी यांच्या मार्गदर्शनाखाली नारायण चिमुलकर व पोलिस सहकाऱ्यांनी ही कारवाई केली आहे.

म्हणून सध्या परवानगी नाही!

सध्या राज्यात कोणत्याही नदीतून रेती उपसा करण्यासाठी परवानगी नाही. राज्य सरकारने परवाने देण्यासाठी आवश्यक असणारा पर्यावरण दाखला न घेतल्याने हे परवाने अडले आहेत. केंद्र सरकारच्या पर्यावरण खात्याने नदीपात्रात तीन मीटर खोलवरपर्यंत रेती काढण्यास परवानगी दिली आहे. इतर राज्यांत नदीच्या सुकलेल्या पात्रातून रेती काढली जाते तर गोव्यात नदीच्या पात्रात पाणी असताना रेती काढली जाते. नदीची पात्रे तीन मीटरपेक्षा जास्त खोल झाल्याने राज्य सरकार हे परवाने जारी करू शकत नाही.