Mopa Airport: रोजगारात 'स्थानिकांना' प्राधान्य द्या! मोपा जन संघटनेचा इशारा

Mopa Locals Protest For Job Preferance At Airport

पेडणे: मोपा विमानतळ प्रकल्पात जीएमआर कंपनीने स्थानिकांना डावलून परराज्यातील उमेदवार घेतले आहेत, त्यांची निवड त्वरित रद्द करून त्या जागी ज्या शेतकऱ्यांच्या शेती बागायत जमिनी या प्रकल्पात गेल्या, त्यातील उमेदवार निवडण्यात यावेत. अन्यथा आम्हाला पुन्हा आंदोलन छेडावे लागेल, असा इशारा मोपा जन संघटनेचे निमंत्रक उदय महाले यांनी दिला.

मोपा जन संघटनेतर्फे कासारवर्णे पंचायत कार्यालयासमोर आज धरणे आंदोलन छेडण्यात आले. त्यावेळी ते बोलत होते. या धरणे आंदोलनाला आज राज्याच्या विविध भागांतील समाज कार्यकर्ते व राजकीय पक्षांच्या नेत्यांनी भेट देऊन मोपा जन संघटनेला पाठिंबा दिला. त्यात गोवा प्रदेश काँग्रेस अध्यक्ष अमित पाटकर, रामा काणकोणकर, शंकर पोळजी, संजय बर्डे यांचा समावेश होता.

महाले पुढे म्हणाले, की नवी मुंबई येथे विमानतळाचे काम करताना ज्या पद्धतीने रॉयल्टी देण्यात आली, जमीन व घरे गेलेल्यांना जमीन व घरे दिली, त्याच पद्धतीचा मोपा विमानतळासाठीही अवलंब व्हावा. या मागण्यांसाठी मोपा विमानतळ परिसरातील ज्या पंचायती पुढे येत नाहीत, अशा ग्रामपंचायतींसमोर आम्ही धरणे धरणार आहोत.

रामा काणकोणकर म्हणाले, की सरकार ज्याप्रकारे नोकऱ्या दिल्याचे सांगते, पण त्या स्थानिकांना मिळाल्या नाहीत, तर त्या नोकऱ्या कुणाला दिल्या. लोकांच्या मालकीच्या जमिनीत विमानतळ उभारण्यात आला, त्याच लोकांना नोकऱ्यांसाठी रस्त्यावर यावे लागते यासारखेदुर्दैव नाही.

‘नोकऱ्यांसाठी आंदोलन’, ही शोकांतिका

अमित पाटकर म्हणाले, देशात भाजपने गोव्याला बेरोजगारीबाबत एक क्रमांकावर नेऊन ठेवले आहे. मनोहर पर्रीकर यांच्यासह भाजप परिवर्तनाच्या नावाखाली गेली बारा वर्षे लोकांची दिशाभूल करत आहे. मोपा विमानतळ प्रकल्पात जमिनी गेलेल्या पेडणेकरांना आणि ग्राम पंचायतींना नोकरी मागण्यासाठी आंदोलन करावे लागते ही शोकांतिका आहे. न्याय मागणीसाठी आमचा या आंदोलनाला पाठिंबा आहे.