Mopa Airport: गोव्यात मोपा येथे नव्याने सुरू झालेल्या आंतरराष्ट्रीय विमानतळाचे रविवारी पंतप्रधान नरेंद्र मोदी यांच्या हस्ते उद्घाटन झाले. याच वेळी या विमानतळाचे गोव्याचे माजी मुख्यमंत्री आणि देशाचे माजी संरक्षण मंत्री मनोहर पर्रीकर यांचे नाव देण्यात आले आहे. मोपा येथील विमानतळाला 'मनोहर आंतरराष्ट्रीय विमानतळ' असे नाव देण्यात आले आहे. खुद्द नरेंद्र मोदी यांनी या अधिकृत नावाची रविवारी घोषणा केली. दरम्यान हे नाव दुरूस्त करावे अशी मागणी गोव्यातील एका भाजप नेत्याने केली आहे.
गोवा भाजपचे प्रवक्ते सॅवियो रॉड्रिग्ज (Savio Rodrigues) यांनी याबाबत मागणी करणारा एक व्हिडिओ सोशल मिडियावर प्रसिद्ध केला आहे.
"मोपा येथील विमानतळाला गोव्याचे आणि देशाचे नेते मनोहर पर्रीकर यांचे नाव देण्यात आले आहे. ही अभिमानाची बाब आहे. पण, मनोहर पर्रीकर हे एकनिष्ठ आणि प्रगतीसाठी समर्पितपणे काम करणारे आदरणीय व्यक्ती होते. त्यांची देशात व जगात मनोहर पर्रीकर अशी ओळख आहे. त्यामुळे मोपा विमानतळाला दिलेले "मनोहर आंतरराष्ट्रीय विमानतळ" नाव दुरूस्त करून "मनोहर पर्रीकर आंतरराष्ट्रीय विमानतळ" असे देण्यात यावे अशी मागणी त्यांनी केली आहे.
याबाबत देशाचे पंतप्रधान नरेंद्र मोदी, मंत्री ज्योतिरादित्य शिंदे आणि मुख्यमंत्री प्रमोद सावंत यांना विनंती केली आहे.
दरम्यान, यापूर्वी मोपा येथील आंतरराष्ट्रीय विमानतळाला काय नाव दिले जावे यावरून मोठा वाद झाला होता. मगो पक्षाने मोपाचे नामकरण गोव्याचे पहिले मुख्यमंत्री भाऊसाहेब बांदोडकर असे करावे अशी मागणी केली होती. तर, काही जणांनी डॉ. जॅक सिक्वेरा यांचे नाव देण्याची मागणी केली होती. तसेच, भाजपने मनोहर पर्रीकर यांचे नाव देण्याची मागणी केली होती. अखेर राज्य सरकारने मनोहर पर्रीकर यांचा नावाचा प्रस्ताव केंद्राला पाठवला आणि पंतप्रधान नरेंद्र मोदी यांनी याची रविवारी अधिकृत घोषणा केली.
पण, केवळ 'मनोहर' एवढेच नाव दिल्याने ते दुरूस्त करून 'मनोहर पर्रीकर' असे नाव देण्याची मागणी होत आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
