केळशीत फिरत्‍या सुश्रुषालयाची स्‍थापना, वृद्ध रुग्‍णांना घरपोच मिळणार वैद्यकीय सेवा

Kelshi Panchayat: घरात एकटेच रहाणार्‍या वृद्धांना त्‍यांच्‍या घरपोच वैद्यकीय आणि सुश्रुषा सेवा प्राप्‍त व्‍हावी यासाठी केळशी ग्रामपंचायतीने दक्षिण गोवा जिल्‍हा इस्‍पितळाच्‍या सहाय्‍याने फिरत्‍या सुश्रुषा केंद्राची सुरुवात केली असून पंचायत पातळीवर सुरु होणार्‍या या पहिल्‍याच अशा प्रकल्‍पाला सिप्ला फाउंडेशनचे सहकार्य लाभले आहे.

केळशीचे सरपंच डिक्सन वाझ यांनी या फिरत्‍या केंद्राचे उद्‍घाटन केले. ज्‍या वृद्धांची देखभाल करण्‍यासाठी घरात कोणी नाही. तसेच इस्‍पितळात जाऊन उपचार करुन घेण्‍याची ज्‍यांना ऐपत नाही अशा वृद्धांसाठी ही सेवा अत्‍यंत मोलाची असून या सेवेअंतर्गत वैद्यकीय कर्मचारी आणि या उपक्रमातील स्‍वयंसेवक रुग्‍णांच्‍या घरी जाऊन त्‍यांना सेवा देणार असल्‍याचे त्‍यांनी सांगितले.

केळशी पंचायत क्षेत्रात अशा प्रकारच्‍या एकूण 45 रुग्‍णांची यादी तयार केली असल्‍याची माहिती त्‍यांनी दिली.

यावेळी सिप्ला फाऊंडेशनचे प्रतिनिधी आर्य देव या प्रकल्पाच्या शुभारंभाच्यावेळी उपस्थित होते आणि त्यांनी स्वयंसेवकांचा प्रतिसाद आणि पाठिंबा पाहून आनंद व्यक्त केला. प्रकल्पाच्‍या प्रकल्प संचालक डॉ. आयरा आल्मेदा यांनी डॉक्टर परिचारिकांची टीम सेवेसाठी दिली आहे.

यावेळी ज्या 45 रुग्णांची तपासणी केली. त्‍यांची पुढील महिन्यात तपासणी करुन पाठपुरावा केला जाईल असे डॉ. आल्‍मेदा यांनी सांगितले. या दिवसभराच्या कार्यक्रमात अनेक स्वयंसेवक आणि पंच सदस्यांनीही भाग घेतला.