MLA Disqualification Petition: आमदार अपात्रता याचिकेवर 'या' दिवशी सुनावणी होण्याची शक्यता!

MLA Disqualification Petition: 2022 मध्ये कॉंग्रेसच्या 8 आमदारांनी भाजपमध्ये पक्षांतर केल्यानंतर गोव्याच्या राजकीय वातावरणात मोठ्या प्रमाणात उलथापालथ झाली. याबाबत काँग्रेसचे नेते गिरीश चोडणकर यांनी काँग्रेस पक्षातून पक्षांतर केलेल्या आठ आमदारांच्या अपात्रतेची याचिका ठराविक मुदतीत निकाली काढण्यासाठी राज्य विधानसभा अध्यक्षांना निर्देश देण्याची मागणी केली होती.

याबाबत महत्वाची माहिती अशी की, त्यांनी दाखल केलेल्या याचिकेवर सर्वोच्च न्यायालयात 4 डिसेंबर रोजी सुनावणी होण्याची शक्यता आहे. सर्वोच्च न्यायालयाने यापूर्वीच सभापती रमेश तवडकर आणि आठ आमदारांना नोटीस बजावली आहे.

उच्च न्यायालयाने 2 मे 2023 च्या निकालात सभापती रमेश तवडकर यांनी अपात्रता याचिकेवर जलदगतीने निर्णय घ्यावा, असे नमूद केले होते आणि या याचिकांवर तीन महिन्यांत निर्णय घ्यावा लागेल, असे म्हटले होते. तरीही अपात्रतेची ही याचिका पुढे सरकलेली नाही. प्रत्यक्षात आजपर्यंत सभापतींनी संबंधित आमदारांना याप्रकरणी नोटिसाही बजावलेल्या नाहीत.

गेल्यावर्षीच्या सप्टेंबरमध्ये काँग्रेसमधून भाजपमध्ये आलेल्या आमदारांच्या अपात्रतेच्या याचिकेवर सभापतींनी निर्णय न घेतल्याचा आरोप करत चोडणकर यांनी सर्वोच्च न्यायालयात याचिका दाखल केली होती.