Mission Rabies: गोवा सरकारचे मिशन 'रेबीज हटाओ!' जनजागृतीसह राबवणार लसीकरण मोहीम

बार्देश: गोवा सरकारकडून बार्देश तालुक्यात रेबीज या जीवघेण्या रोगाचे निर्मूलन करण्यासाठी मोठी लसीकरण आणि प्रशिक्षण मोहीम सुरू केली जाणार आहे. मिशन रेबीज आणि पशुसंवर्धन तसेच पशुवैद्यकीय सेवा संचालनालय यांच्या संयुक्त विद्यमाने ही मोहीम राबविण्यात येणार आहे. या मोहिमेचा शुभारंभ शुक्रवार, २१ फेब्रुवारी २०२५ रोजी सकाळी १० वाजता श्रीराम विद्या मंदिर शाळा परिसर, कोलवाळ येथे होणार आहे. गोव्याचे मुख्यमंत्री प्रमोद सावंत यांच्या हस्ते या कार्यक्रमाचा उद्घाटन समारंभ पार पडेल.

गोवा हे राज्य रेबीज-नियंत्रित राज्य म्हणून अधिसूचित केले गेले असले तरीही काही भागांमध्ये अजूनही रेबीजची लागावण झाल्याचे दिसून आले आहे आणि म्हणून या रोगाला मुळापासून नष्ट करण्यासाठी हा उपक्रम राबवला जाणार आहे. वर्ष २०२३ आणि २०२४ मध्ये बार्देश तालुक्यात तीन रुग्ण आढळले होते आणि त्यामुळे या मोहिमेच्या माध्यमातून बार्देशमधून रेबीजचा प्रसार रोखण्यात यश मिळेल, अशी आशा आयोजकांनी व्यक्त केली आहे.

शुक्रवारी होणाऱ्या या उद्घाटन कार्यक्रमात लहान मुलांची रॅली, डिजिटल जनजागृती, डॉगी फ्लोट परेड, पथनाट्ये आणि डॉगी डान्स यांसारखे विविध कार्यक्रम आयोजित केले जाणार आहेत. मिशन रेबीजचे मुख्य कार्यकारी अधिकारी डॉ. लूक गॅम्बल देखील यावेळी उपस्थित राहणार आहेत.

या कार्यक्रमाचे उद्घाटन शुक्रवारी होईल आणि त्यानंतर शैक्षणिक उपक्रम सुरु होतील. लसीकरण आणि निर्जंतुकीकरण मोहीम २४ फेब्रुवारीपासून सुरू होऊन २८ फेब्रुवारीपर्यंत चालेल. मोहीमेअंर्गत काम करणारी लसीकरण पथके सकाळी ६:३० ते ११:३० आणि दुपारी ३ ते ६ या वेळेत काम करतील. या मोहिमेत सुमारे १५०० लोक सहभागी होणार आहेत, ज्यात ३२ लसीकरण पथके, ५ शिक्षण पथके आणि एक सर्वेक्षण पथक असेल. आंतरराष्ट्रीयस्थरावर देखील पशुवैद्य आणि विद्यार्थी देखील या प्रयत्नात सहभागी होणार आहेत.