गोवा वनविभागाचे मोठे पाऊल, हवामान बदलाच्या माहितीसाठी 5 ठिकाणी बसवली अत्याधुनिक AWS सुविधा, देशातील पहिलेच राज्य

Minister Vishwajit Rane Inaugurated Five Automatic Weather Station In Goa: हवामानात होणाऱ्या वारंवार बदलांबाबत अचूक माहिती व अंदाज मिळावा यासाठी सरकारच्या वतीने राज्यभरात पाच वाईल्ड लाईफ सेंच्युरीत ऑटोमेटिक हवामान स्टेशन स्थापन करण्यात आली आहेत. याचे उद्गाटन सत्तरी तालुक्यातील माळोली म्हादई वाईल्ड लाईफ कार्यालयात वनमंत्री विश्वजीत राणे यांच्या हस्ते करण्यात आले.

म्हादई, बोंडला, मोले, नेत्रावळी, खोतिगाव या पाच वाईल्ड लाईफ सेंच्युरीत अशी यंत्रणा कार्यान्वित करण्यात आली आहे.

"ऑटोमेटिक हवामान स्टेशनच्या माध्यमातून हवामानाचा अंदाज घेता येणार आहे. ग्रामीण भागातील सेंच्युरीत अनेकवेळा महापूर येणे, वादळ येणे, वादळाची दिशा, हवामानात होणारे बदल, जंगल व्यवस्थापन, जंगलाला आग लागणे यावर संशोधन करण्यासाठी तसेच हवामानात होणारे वारंवार बदल यावर अभ्यास करण्यासाठी हे स्टेशन उपयुक्त ठरणार आहे" असे मंत्री राणे यांनी सांगितले.

यावेळी म्हादई विभागाचे प्रिंसिपल चीफ कन्झर्वेटर ऑफ फोरेस्ट राजीव कुमार गुप्ता, चीफ वाईल्ड लाईफ वार्डन उमाकांत, वनविकासचे चीफ कंझर्वेटर प्रवीण कुमार राघव, चीफ फॉरस्टचे एडमिनीस्ट्रेशनचे सुरभ कुमार, सौरव कुमार, माळोली म्हादई विभागाचे वनअधिकारी गिरिश बैलुडकर आदींची उपस्थिती होती.