Pilgao: खाणविरोधी आंदोलनकर्त्यांना नोटीस! पिळगावात खळबळ; संतप्त जमावाची पोलिस स्थानकावर धडक

Pilgao mining issue

डिचोली: खनिज वाहतूक आंदोलनप्रश्नी पोलिसांनी नोंद केलेल्या गुन्ह्यावरून उपजिल्हाधिकाऱ्यांनी सेसा कामगार संघटनेच्या पदाधिकाऱ्यांसह कपात केलेल्या कामगारांना नोटीस बजावली आहे. यामुळे आंदोलनकर्त्यांमध्ये खळबळ माजली आहे.

दरम्यान, नेमक्या कोणत्या आरोपाखाली पोलिसांनी गुन्हा नोंद केला आहे, त्याची खातरजमा करून घेण्यासाठी पिळगावातील आंदोलनकर्त्यांनी डिचोली पोलिस स्थानकावर धडक दिली , अशी माहिती मिळाली आहे.

त्यामुळे पिळगावातील आंदोलनाचा मुद्दा पुन्हा ऐरणीवर येण्याची शक्यता आहे. दरम्यान, एकप्रकारे खाण विरोधी आंदोलनकर्त्यांची ही सतावणूक असल्याचे कामगारांचे कायदा सल्लागार ॲड. अजय प्रभूगावकर यांनी म्हटले आहे.

१९ रोजी उपजिल्हाधिकाऱ्यांकडे सुनावणी

खनिज वाहतूकप्रश्नी गेल्या १ जानेवारी रोजी केलेल्या आंदोलनावेळी अशोभनीय भाषा वापरल्यासंदर्भात डिचोली पोलिसांनी बीएनएनएसच्या १२६ कलमाखाली गुन्हा नोंद केला आहे. या गुन्ह्याला अनुसरून सेसा कामगार संघटनेचे अध्यक्ष नीलेश कारबोटकर, बाबुसो कारबोटकर आणि अनिल सालेलकर या कपात केलेल्या कामगारांना उपजिल्हाधिकाऱ्यांनी नोटीस बजावली आहे. १९ रोजी सकाळी १०.३० वा. उपजिल्हाधिकारी न्यायालयात हजर राहावे, असे नोटिशीत नमूद केले.