Dicholi: शहरातील बसस्थानक परिसरात परप्रांतीय मजूर घोळक्याघोळक्याने उभे राहत असल्याने विविध समस्या निर्माण होत आहेत. या मजुरांची संख्या दिवसेंदिवस वाढत असल्याने परिसराला ओंगळवाणे स्वरूप प्राप्त झाले आहे. भर रस्त्यावर दाटीवाटीने राहणाऱ्या या मजुरांमुळे वाहतुकीसही अडथळा होतो. एखादेवेळी अपघात घडण्याची शक्यताही नाकारता येत नाही.
बऱ्याच वर्षांपासून डिचोलीत परप्रांतीय मजुरांची समस्या कायम आहे. कर्नाटक, झारखंड, उत्तर प्रदेश, बिहार आदी राज्यांतील मिळून ५०० हून अधिक मजूर बसस्थानक परिसरात दाटीवाटीने उभे राहिलेले दिसून येतात.
रोज सकाळी साधारण साडेआठ वाजल्यापासून हे मजूर बसस्थानक परिसरात येण्यास सुरुवात होते. पान, तंबाखू, गुटखा खाऊन थुंकत असल्याने येथे स्वच्छतेचा प्रश्‍न निर्माण होतो.
पोलिसांकडून कारवाई
डिचोलीत नवीन बसस्थानक बांधण्याचे काम चालू असल्याने तात्पुरते पर्यायी बसस्थानक उभारण्यात आले आहे. या बसस्थानकावर बसगाड्या आत-बाहेर घेताना बसस्थानकाबाहेर थांबणाऱ्या मजुरांचा मोठा अडथळा ठरत होता. त्यामुळे गेल्या एप्रिल महिन्यात या मजुरांना पोलिसांनी तेथून हुसकावून लावले होते. मजुरांची धरपकडही सुरू केली होती. त्यावेळी गर्दी कमी झाली होती.
परत होते गर्दी
पोलिसांच्या कारवाईनंतर या मजुरांनी आपला मोर्चा बसस्थानकाच्या मागच्या बाजूने वळविला होता. त्यामुळे गेले काही महिने बसस्थानक परिसर काहीसा मोकळा वाटत होता. मात्र, आता हे मजूर परत बसस्थानकासमोर राहत असल्याने सध्या बसस्थानकाच्या मागच्या बाजूने तसेच बसस्थानकासमोर भर रस्त्यावर गर्दी होत आहे.
अनर्थ घडण्याची भीती
बसस्थानकाबाहेर दाटीवाटीने उभे राहणाऱ्या या मजुरांमुळे सकाळी साधारण एक-दीड तास वाहतुकीस अडथळा निर्माण होतो. मजुरांच्या गर्दीमुळे प्रवासी बसगाड्या आतबाहेर घेताना एखादेवेळी मोठा अनर्थ घडण्याची भीती व्यक्त होत आहे. त्यामुळे या मजुरांना तेथून कायमचे हुसकावून लावावे, अशी मागणी नागरिकांकडून करण्यात येत आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.