Quepem Municipality: बाजार प्रकल्पातील दुकानांसंबंधी नगराध्यक्षांनी दिलीय 'ही' महत्वाची माहिती

Quepem Municipality केपे पालिका बाजार प्रकल्पाचे उद्‌घाटन होऊन वर्ष उलटले आहे. आता येत्या दोन महिन्यांत या प्रकल्पातील दुकानांचा लिलाव करण्यात येणार असल्याचे नगराध्यक्ष सुचिता शिरवईकर यांनी सांगितले.

याविषयावर चर्चा करण्यासाठी मंगळवारी (ता.27) पालिका मंडळाची खास बैठक बोलावण्यात आली होती.

या प्रकल्पाचे उद्‌घाटन होऊन दीह वर्ष उलटले तरी अद्याप प्रकल्प सुरू का होत नाही, अशी लोकांमध्ये चर्चा सुरू होती. या प्रकल्पाचे सर्व काम पूर्ण झाले असून आता ज्या दुकानदारांचे जुन्या इमारतीतून स्थलांतर करण्यात आले होते त्यांच्याविषयीही यावेळी चर्चा करण्यात आल्याचे शिरवईकर यांनी सांगितले.

हा प्रकल्प तयार असूनही तो सुरू न झाल्याने पालिकेला महसुलापासून वंचित राहावे लागत आहे. लवकरात लवकर प्रकल्प सुरू करण्याचा आमचा विचार असून येत्या दोन महिन्यांत सर्व प्रक्रिया पूर्ण करून दुकानांचा लिलाव करण्यात येणार असल्याचे त्यांनी सांगितले.

जुन्या जागीच नवीन प्रकल्प

ज्या ठिकाणी हा प्रकल्प उभारण्यात आला आहे, त्या ठिकाणी पूर्वी पालिकेची जुनी इमारत होती तसेच मासळी मार्केट होते.

ही इमारत जुनी झाल्याने ती व्यापाऱ्यांसाठी धोकादायक बनल्याने त्या ठिकाणी व्यापार करणाऱ्या व्यापाऱ्यांचे दुसऱ्या जागी स्थलांतर करून त्याच जागेवर नवीन बाजार प्रकल्प उभारण्यात आला आहे.

2021 साली विधानसभा निवडणुकीपूर्वी या प्रकल्पाचे मुख्यमंत्री डॉ. प्रमोद सावंत यांच्या हस्ते धडाक्यात उद्‌घाटन करण्यात आले होते.