Mavin Gudinho: गरबा व दांडिया स्पर्धेत मंत्री माविन गुदिन्हो यांनी धरला ठेका

सध्या सर्वदूर नवरात्रोत्सवाची धूम आहे. गरबा व दांडियाची खेळात अबालवृद्ध रमताना दिसत आहेत. वास्को (Vasco) नवे वाडे येथील आश्चर्य स्पोर्ट्स अँड कल्चरल क्लबने अखिल गोवा गरबा व दांडिया स्पर्धा आयोजित केल्या आहेत. या स्पर्धेचे उद्धाटन पंचायत मंत्री माविन गुदिन्हो (Mavin Gudinho) यांच्या हस्ते करण्यात आले. यावेळी मंत्री माविन गुदिन्हो यांनी गरब्याच्या गाण्यांवर ठेका धरला.

नवेवार्ड येथील वाडेनगर इंग्लिश स्कूलसमोरच्या पटांगणवर सदर स्पर्धेचे आयोजन केले आहे. गरबा व दांडिया स्पर्धा 5 ऑक्टोबरपर्यंत सुरू राहणार आहे. विजेत्यांना पहिले बक्षीस 50 हजार रुपये, दुसरे बक्षीस 30 हजार रुपये, तर तिसरे बक्षीस 20 हजार रुपयांचे देण्यात येणार आहे.

स्पर्धेला स्पर्धकांचा चांगला प्रतिसाद मिळत आहे. स्पर्धेच्या शुभारंभप्रसंगी गुदिन्हो यांच्यासह सरपंच संकल्प महाले, जिल्हा पंचायत सदस्य अनिता थोरात, माजी नगराध्यक्ष क्रितेश गावकर, नगरसेवक विनोद किनळेकर, भाजप दाबोळी मंडळ अध्यक्ष संदीप सूद व इतर मान्यवर उपस्थित होते. गुदिन्हो यांनी नागरिकांना उत्सवात सहभागी होण्याचे आवाहन केले.

गुदिन्हो यांनी क्लबचे अध्यक्ष रोहन देसाई व इतरांचे कौतुक केले. सदर स्पर्धा होऊ नये यासाठी काहीजणांनी अडथळे आणण्याचे प्रयत्न केले; परंतु ते यशस्वी झाले नाहीत. या शुभारंभानंतर गुदिन्हो हे गरबा नृत्यमध्ये सहभागी झाले. त्यांना सरपंच सकल्प महाले, विनोद किनळेकर व इतर यांनी साथ दिली.