Goa Cricket Team: गोव्याच्या क्रिकेटपटूंना मास्टर ब्लास्टर सचिनचे मार्गदर्शन

Goa Cricket Team: महान क्रिकेटपटू सचिन तेंडुलकर याचा मुलगा अर्जुन सलग दुसऱ्या वर्षी गोव्यातर्फे देशांतर्गत क्रिकेटमध्ये खेळत आहे. त्या अनुषंगाने विक्रमवीर क्रिकेटपटूने शुक्रवारी पर्वरी येथील जीसीए अकादमी मैदानावर उपस्थित लावली आणि गोव्याच्या रणजी, तसेच युवा वयोगटातील क्रिकेटपटूंना मौल्यवान मार्गदर्शन केले. गोव्याच्या संघासाठी तो एकप्रकारे ‘मेंटॉर’ ठरला.

सचिन मैदानावर येणार याची अगोदर कल्पना नव्हती, त्यामुळे तो मैदानावर येताच विशेषतः गोव्याच्या वयोगट क्रिकेट संघातील युवा क्रिकेटपटूंना आश्चर्याचा धक्का बसला. सचिनने क्रिकेटपटूंसमवेत फोटोही काढले.

शिवाय नेटमध्ये सराव करणाऱ्या सीनियर संघाची कामगिरी पाहिली, खेळाडूंना महत्त्वाच्या टिप्सही दिल्या. त्याने मैदानावरील उपस्थितीत गोवा क्रिकेट असोसिएशनचे अध्यक्ष विपुल फडके, सचिव रोहन गावस देसाई, तसेच अन्य पदाधिकाऱ्यांसमवेत चर्चा केली.