पहिली पत्नी हयात असताना दुसरीशी लग्न

सांगे : एक पत्नी हयात असताना तिला घटस्फोट न देता दुसरे लग्न केल्याप्रकरणी कुळे येथील साईनाथ खांडेपारकर याला कलम 494 अन्वये दोन वर्षे सश्रम कारावास व दहा लाखांचा दंड,अशी शिक्षा शनिवारी (दि.11) सांगे न्यायालयाने सुनावली.

न्यायाधीश सुनीता गावणेकर यांच्या न्यायालयाने सदर शिक्षा सुनावली आहे. खोटी कागदपत्रे तयार करून फसवणूक केल्याप्रकरणी न्यायालयाने आरोपी खांडेपारकर याला कलम 193 अन्वये एक वर्षाचा सश्रम कारावास व पाच हजारांचा दंड ठोठावला आहे.

कुळे येथील साईनाथ खांडेपारकर याने पहिले लग्न सांगे येथील लग्न नोंदणी कार्यालयात कागदपत्रे सादर करून केले होते.

आरोपीने दुसरे लग्न पहिली पत्नी असताना घटस्फोट न देताच धारबांदोडा येथील विवाह नोंदणी कार्यालयात खोटी कागदपत्रे सादर करून केले होते.

...तर पुन्हा एक वर्ष कारावास

निर्धारित वेळेत दहा लाखांची रक्कम जमा न केल्यास आणखी एक वर्ष सक्त कारावासाची शिक्षा भोगावी लागेल, असेही आदेशात म्हटले आहे. अर्जदाराची बाजू अॅड. अभिलाषा शिवाजी नाईक यांनी मांडली.