Margao Municipality: मडगाव पालिका कचरा हाताळणीत अकार्यक्षम

Margao Municipality: मडगावातील ओल्या कचऱ्यावर प्रक्रिया करण्यासाठी उभारण्यात आलेल्या बायोमिथेनेशन प्रकल्पाच्या फसलेल्या प्रयोगानंतर आता गोवा राज्य कचरा व्यवस्थापन महामंडळ मडगावातील कचरा हाताळणी करणार आहे. मुख्यमंत्री डॉ. प्रमोद सावंत यांनी विधानसभेत तसा प्रस्ताव सादर केला.

ते म्हणाले, आधीच्या प्रयोगातून मडगाव पालिका सक्षमपणे हा प्रश्न हाताळू शकत नसल्याने पालिकेने कचरा कर महामंडळाकडे जमा करावा, प्रकल्प उभारण्यापासून तो चालवण्यास देण्यापर्यंत सारी व्यवस्था महामंडळ हाताळेल, असा प्रस्ताव पालिकेला दिला आहे. तो त्यांनी स्वीकारला तर कचरा समस्या सुटू शकते.

फातोर्ड्याचे आमदार विजय सरदेसाई यांनी याविषयी प्रश्न विचारला होता. ते म्हणाले, बायोमिथेनेशन प्रकल्पात मासे घेणे बंद केले, मासळी बाजारातील प्रकल्पात मासळीच घेतली जाणार नाही तर त्याचा उपयोग काय.

सशुल्क सेवा देणार

मुख्यमंत्री म्हणाले, काकोडा येथील प्रकल्पात सगळा कचरा नेला जाऊ शकत नाही. काणकोण, सांगे, केपे आणि धारबांदोडा तालुक्यातील कचरा तेथे येऊ लागल्यावर त्या प्रकल्पाची क्षमता पूर्ण होईल. त्यामुळे मडगावच्या कचऱ्यावर मडगावातच प्रक्रिया करावी लागेल. त्यासाठी गोवा कचरा व्यवस्थापन महामंडळ आता सशुल्क अशी ही सेवा देणार आहे.

कायमस्वरूपी तोडगा काढा

कुडतरीचे आमदार आलेक्स रेजिनाल्ड लॉरेन्स म्हणाले, या प्रकल्पांमुळे आमदारांवर लोक आरोप करतात. आणखीन असे आरोप नको. याप्रश्नी सरकारने कायमस्वरूपी तोडगा काढला पाहिजे. सोनसड्यावर चांगल्या तंत्रज्ञानाचा प्रकल्प हवा. कुडतरीचा कचरा तेथे जात नाही.