Margao: गंडा घालणाऱ्या 'योगेश'च्या बडतर्फीचा विषय नाहीच! 'कॅफेटेरिया'चा वादग्रस्त मुद्दा मडगाव पालिकेत अजेंड्यावर

Margao Municipal Council Meeting

मडगाव: मडगाव पालिकेची शुक्रवार, ३ रोजी होणारी बैठक पुन्हा एकदा गाजणार आसल्याचे संकेत मिळू लागले आहेत. मडगाव पालिका उद्यानात कॅफेटारिया उघडण्याचा प्रस्ताव या बैठकीच्या विषय पत्रिकेवर आणला असून हाच विषय या बैठकीला वादाचे वळण मिळवून देणारा ठरण्याची शक्यता व्यक्त केली जात आहे.

मडगाव पालिका उद्यानात जिथे गणपती पूजन होते त्या जागेची डागडुजी करून त्या ठिकाणी कॅफेटारिया उघडण्याचा प्रस्ताव या बैठकीत चर्चेत येणार आहे.

दरम्यान, यासंबंधी भाष्य करताना शॅडो कौन्सिलचे निमंत्रक सावियो कुतिन्हो यांनी हा प्रस्ताव यापूर्वीही चर्चेत आला होता.

मडगावात बहुमजली पार्किंग तळ उभारणाऱ्याकडून हा प्रस्ताव आला असावा आणि यामागे काहीतरी काळेबेरे असण्याची शक्यता असल्याची शंका त्यांनी व्यक्त केली. मडगाव पालिकेला १८ लाखांचा गंडा घालणाऱ्या योगेश शेटकर या करकुनाला सेवेतून बडतर्फ करण्यासंदर्भात या बैठकीत काहीच चर्चा ठेवण्यात आलेली नाही, याबाबत त्यांनी आश्चर्य व्यक्त केले आहे.