Margao News : 'वंदे भारत’ मुंबईला पोहोचली 11 तासांत; आजपासून नियमित सेवा सुरू

Margao : देशातली पहिली सेमी हाय स्पीड ट्रेन असलेली मडगाव-मुंबई दरम्यानची शुभारंभाची गाडी काल रात्री ९ वाजता म्हणजे १० तासांनी छत्रपती शिवाजी महाराज टर्मिनसला दाखल झाली. परतीची गाडी दुपारी मुंबईहून सुटून सायंकाळी मडगाव स्थानकावर दाखल झाली.

आजपासून मडगाव - मुंबई वंदे भारत एक्सप्रेसची नियमित सेवा सुरू झाली असून आता आठवड्याला तीन वेळा धावणार आहे.काल सकाळी ११ वाजता शुभारंभाची गाडी मडगाव रेल्वे स्थानकावरून सुटली होती. रात्री ९ वाजता मुंबईला ती पोहोचली, अशी माहिती कोकण रेल्वेचे जनसंपर्क अधिकारी बबन घाटगे यांनी दिली.

मुंबई सीएसएमटी येथून दर सोमवार, बुधवार आणि शुक्रवारी सकाळी ५:२५ वाजता सुटेल आणि त्याच दिवशी दुपारी ३:३० वाजता मडगावला पोहोचेल. दुसऱ्या दिवशी म्हणजे दर मंगळवार, गुरुवार आणि शनिवारी दुपारी १२:२० वाजता मडगावहून सुटणार असून आणि त्याच दिवशी रात्री १०:२५ वाजता मुंबई सीएसएमटीला पोहोचेल.

नोव्हेंबरपासून सहा दिवस

१ नोव्हेंबरपासून आठवड्यातून ६ दिवस चालेल. ही ट्रेन दादर, ठाणे, पनवेल, खेड रत्नागिरी, कणकवली आणि थिवी येथे थांबेल. एकूण ०८ डब्यांच्या या गाडीचे- डीटीसी- ०२, चेअर कार - ०५ तर एक्झक्युटिव्ह चेअर कार - ०१ अशी रचना आहे.