सासष्टी, ता. १९ (प्रतिनिधी) : माजी आमदार चर्चिल आलेमाव यांनी आज गोमंतकीय पारंपरिक मच्छीमारांसह एसजीपीडीएचे अध्यक्ष तथा आमदार कृष्णा उर्फ दाजी साळकर यांची भेट घेतली.
घाऊक मासळी मार्केटमध्ये उरलेली मासळी विक्रीसाठी मच्छीमारांना आणखी थोडा वेळ द्यावा, अशी मागणी त्यांनी केली.
यावेळी दाजी साळकर म्हणाले की, उच्च न्यायालयाच्या निर्देशाप्रमाणेच आम्हाला निर्णय घ्यावे लागतात. त्याप्रमाणे आम्ही नियोजन के आहे. ही कायदेशीर बाब असल्याने आम्ही मच्छीमारांना कोणतेही आश्र्वासन दिलेले नाही.
त्यांनी स्वत:च काहीतरी पर्याय शोधावा, असा सल्ला त्यांना दिला आहे. आम्ही मार्केटमध्ये स्वच्छतेला प्राधान्य देत असून सीसीटीव्ही कॅमेरे बसविण्याचे काम हाती घेतले आहे.
यावेळी आलेमाव म्हणाले की, पारंपरिक गोमंतकीय मासळी विक्रेत्यांकडे उरलेली मासळी साठवून ठेवण्यासाठी पुरेशी साधनसुविधा नाही. काही वेळानंतर मासळी खराब होते.
त्यामुळे आणलेल्या सर्व मासळीची विक्री होईपर्यंत त्यांना थांबावे लागते. या मासळी विक्रेत्यांना आणखी थोडा वेळ मासळी विक्रीची मोकळीक द्यावी, अशी विनंती त्यांनी केली.
मी यासंदर्भात मुख्यमंत्री डॉ. प्रमोद सावंत, मडगावचे आमदार दिगंबर कामत यांच्याशीही चर्चा केली असून सर्वांनीच सहानुभूतीपूर्वक तोडगा काढू, असे सांगितल्याचे आलेमाव म्हणाले.
यापूर्वी पारंपरिक मच्छीमारांना मासे विक्रीसाठी वेळ ठरवून दिली असून तेथील किरकोळ विक्रेत्यांना अन्यत्र जागा देण्यात येणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.