Margao Bus Stand: मडगाव कदंब स्थानकावर मोठी रांग

Margao Bus Stand : फातोर्डा, मडगाव येथील कदंब बस स्थानकावर पणजी येथे जाण्यासाठी मंगळवारी मोठी रांग लागली होती.

कोकण रेल्वेने मडगावात दाखल झालेल्या पर्यटकांचा यात समावेश होता. शटल सर्व्हिस बस उपलब्ध नसल्याने रांगेत राहणे आवश्‍यक ठरले.

हा प्रकार सकाळी घडला होता. अनेक प्रवाशांना दीड ते दोन तास ताटकळत उभे राहावे लागले. यात पर्यटक व नियमीत प्रवाशांचाही समावेश होता.

आंतर-गोवा शटल सर्व्हिससाठी प्रवाशांना तिकिटे तत्काळ रांगेत उभी राहिल्यानंतर दिली जातात, तर लोकल तिकीट बसमध्ये देण्यात येतात.

याविषयी कदंब परिवहन मंडळाचे व्यवस्थापक संजय घाटे यांनी सांगितले की, मडगावहून पणजीला येण्यासाठी प्रवाशांना मोठ्या प्रमाणात सोय केली आहे.

जर एकाच वेळी मोठ्या प्रमाणात प्रवाशांची गर्दी झाली तर तोडगा काढणे कठीण काम आहे. तसेच मडगावात येणाऱ्या गाड्या खाली येत असल्याने महामंडळ नुकसान सोसावे लागते.