Ponda: फर्मागुढीत होणार ‘निर्धार मेळावा’! मराठीप्रेमींना एकजूट दाखविण्याचे समितीचे आवाहन

फोंडा: मराठी राजभाषा निर्धार समितीतर्फे रविवार, २५ रोजी सायंकाळी ४.३० वा. फर्मागुढी-फोंडा येथील गोपाळ गणपती सभागृहात मराठी मेळाव्याचे आयोजन करण्यात आले आहे. यासंबंधीची माहिती फोंड्यात घेतलेल्या पत्रकार परिषदेत देण्यात आली.

यावेळी मेळावा आयोजन समितीचे अध्यक्ष शाणुदास सावंत, निर्धार समितीचे मार्गदर्शक गो.रा. ढवळीकर तसेच ॲड. मनोहर आडपईकर, जयंत मिरिंगकर, दिवाकर शिंक्रे व विनोद पोकळे आदी उपस्थित होते. यावेळी निर्धार समितीच्या मेळाव्याचा प्रचार आणि प्रसारासाठी डिजिटल माहितीचे उद्‌घाटनही करण्यात आले.

दरम्यान, या मेळाव्याला किमान पाचशे मराठीप्रेमी उपस्थित राहणार असून मेळाव्यात मराठीला राजभाषेचे स्थान मिळवून देण्यासाठी निर्धार व्यक्त करण्यात येणार आहे. राज्यात मराठीचा वावर आणि वापर मोठ्या प्रमाणात असून यावेळेला सरकारने मराठीला मानाचे स्थान द्यायलाच हवे, असे विचार गो. रा. ढवळीकर, मनोहर आडपईकर, विनोद पोकळे, जयंत मिरिंगकर, दिवाकर शिंक्रे व उदय डांगी यांनी व्यक्त केले.

राज्यभर जागृती सुरू

मराठी भाषेला राजभाषेचे स्थान डावलल्यामुळे मराठी भाषकांवर अन्याय झाला असून हा अन्याय दूर करण्यासाठी सरकारने मराठी भाषेला राजभाषेचे स्थान द्यावे, अशी मागणी सातत्याने मराठीप्रेमी करीत आहेत. त्या अनुषंगाने राज्यभर जागृती व्हावी यासाठी अशाप्रकारच्या मेळाव्यांचे आयोजन राज्यात करण्यात येत आहे. त्यातीलच हा एक मेळावा फोंडा तालुक्यात होणार असल्याची माहिती शाणुदास सावंत यांनी दिली.