Marathi Official Language: 'राजभाषेचा दर्जा द्या अन् वाद मिटवा'! मराठीप्रेमींचे आवाहन; मुख्यमंत्री निवासापुढे आंदोलनाचा दिला इशारा

मोरजी: कोकणीसह मराठी भाषेलाही त्वरित राजभाषेचा दर्जा द्यावा. अन्यथा शासकीय निवासापुढे धरणे धरू, असा इशारा मराठी प्रेमींनी पेडणेत जुन्या बस स्थानकासमोर आयोजित धरणे आंदोलनावेळी दिला. घटनेनुसार मराठीलाही राजभाषेचा दर्जा देऊन सध्या कोकणी मराठीप्रेमींमध्ये पसरत चाललेला वाद कायमचा मिटवावा, असे आवाहनही केले.

मांद्रेचे माजी सरपंच ॲड. अमित सावंत म्हणाले, मुख्यमंत्री डॉ. प्रमोद सावंत हे दिग्गज मराठी गायक महेश काळे यांचे गायन आपल्या साखळी मतदारसंघात ठेवतात. परंतु मराठी राजभाषा करण्यासाठी ते सरळ का बोलत नाहीत, असा सवाल करून मुख्यमंत्री जोपर्यंत मराठीला राजभाषेचा दर्जा देत नाहीत, तोपर्यंत मराठीप्रेमींनी मोठ्या गर्दीने त्यांच्या सरकारी निवासस्थानी आंदोलन छेडावे. आणि राज्यभाषा झाल्यानंतरच हे आंदोलन संपुष्टात आणावे, असे आवाहन ॲड.सावंत यांनी केले.

गोवा सरकारने अलिकडे शासकीय नोकऱ्यांसाठीच्या परीक्षेत कोकणीची प्रश्नपत्रिका सक्तीची करून नोकरीसाठी कोकणी उत्तीर्ण होणे अनिवार्य करून मराठीवर अन्याय केल्याचा, तसेच गोवा सरकारकडून मराठीवर सातत्याने होत असलेल्या अन्यायाचा प्रातिनिधिक निषेध करण्यासाठी मराठी राजभाषा निर्धार समितीच्या पेडणे व मांद्रे प्रखंडातर्फे पेडणे येथील जुन्या बसस्थानक चौकात धरणे आंदोलन करण्यात आले.

मांद्रेचे माजी सरपंच एड.अमित सावंत,मराठी राजभाषा निर्धार समितीचे केंद्रीय कार्यकारिणीचे सदस्य निवृत्त प्राचार्य गजानन मांद्रेकर,समितीचे राज्य युवाशक्ती प्रमुख विनायक च्यारी,पेडणे प्रखंडाचे अध्यक्ष मुख्याध्यापक शरद गावडे,निवृत्त मुख्याध्यापक रजनीकांत गावडे,निवृत्त शिक्षक लक्ष्मण गावडे,धारगळचे पंच सदस्य सतीश धुमाळ,युवा शिक्षिका संध्या आरोलकर यांची शासनातर्फे मराठीवर सतत होत असलेल्या अन्यायाचा निषेध करणारी भाषणे झाली.

गजानन मांद्रेकर यांनी समारोपाच्या भाषणात मराठी राजभाषा निर्धार समितीच्या आगामी कार्यक्रमांची माहिती दिली. शरद गावडे यांनी स्वागत व प्रास्ताविक केले.मांद्रे प्रखंडाचे अध्यक्ष आत्माजी नाईक यांनी आभार मानले.