Atal Setu: अंधार, संशयास्पद हालचाली; अटल सेतूखाली नेमके चालते काय? म्हापसा चोरीतले वाहन सापडल्याने विषय ऐरणीवर..

पणजी: अटल सेतूखाली नेमके काय सुरू असते, हा प्रश्न पुन्हा एकदा गंभीरपणे पुढे आला आहे. म्हापसा येथील चोरीप्रकरणात वापरलेले वाहन अटल सेतूखाली सापडल्याने या ठिकाणचा संशयास्पद वापर पोलिसांच्या निदर्शनास आला आहे.

मिळालेल्या माहितीनुसार, अटल सेतूखाली विशेषतः बसस्थानकाजवळील भागात मोठ्या प्रमाणावर बेकायदेशीर पार्किंग तसेच अनधिकृत व्यवसाय सुरू आहे. सकाळच्या वेळेत काहीजण या ठिकाणी शहाळे विक्री करताना दिसतात, तर रात्रीच्या वेळी येथे अनेकांचा संशयास्पद वावर असतो.

या पुलाखाली सुमारे २५ पेक्षा अधिक बसेस, काही पर्यटक टॅक्सी, तसेच दुचाकी वाहने दीर्घकाळ पार्क करून ठेवण्यात येतात. अंधार, वीज नसणे आणि पोलिसांची नियमित गस्त नसल्याने हा परिसर गुन्हेगारीसाठी पोषक ठरत असल्याची भीती नागरिकांमध्ये व्यक्त केली जात आहे.

स्थानिक सूत्रांच्या म्हणण्यानुसार, रात्री उशिरापर्यंत काही व्यक्ती या ठिकाणी थांबलेले दिसतात, तसेच काही व्यवहारही चालतात. प्रकाशयोजना नसल्याने अंधाराचा फायदा घेत विविध बेकायदेशीर हालचाली सुरू असण्याची शक्यता वर्तवली जात आहे.

अटल सेतू हा राजधानीतील अत्यंत महत्त्वाचा दुवा असून, त्याखाली अशाप्रकारच्या अनधिकृत हालचाली सुरू राहिल्यास सुरक्षेच्या दृष्टीने गंभीर परिणाम होऊ शकतात. त्यामुळे या ठिकाणी नियमित पोलिस गस्त, सीसीटीव्ही यंत्रणा आणि योग्य प्रकाशव्यवस्था आवश्यक असल्याचे नागरिकांचे मत आहे.