Mapusa News : दैव बलवत्तर! माय-लेक बचावले; मालवाहू ट्रकला कारची मागून धडक

Mapusa News : म्हापसा, कामरखाजन-म्हापसा येथे राष्ट्रीय महामार्गावर रस्त्याच्या बाजूला असलेल्या मालवाहू ट्रकला मागून कारने धडक दिली. या अपघातात कारमधील माय-लेक किरकोळ जखमी झाली.

हा अपघात सोमवारी (ता.११) दुपारी २ वा.च्या सुमारास घडला. या अपघातात सुकूर येथील कारचालक केतकी रूपेश गडेकर व त्यांची मुलगी ध्रुवी (७) ही किरकोळ जखमी झाली. म्हापशातील खासगी इस्पितळात त्यांच्यावर उपचार करण्यात आले.

जीए ०५ टी ६१४२ क्रमांकाचा मालवाहू ट्रक गिरी ते करासवाड्याच्या दिशेने राष्ट्रीय महामार्गावरून जात होता. तर त्याच दिशेने मागून जीए ०३ एएफ ४२८८ क्रमांकाची मारुती एसप्रेसो ही कार चालली होती.

घटनास्थळी ट्रकचालक संग्राम हलेमनी (काले-सांगे) याने गती कमी करत ट्रक रस्त्याच्या बाजूने घेतला. याचवेळी मागून आलेल्या कारने ट्रकला धडक दिली आणि कारच्या दर्शनी भागाचे नुकसान झाले.

ट्रकला धडक बसताच कारमधील एअर बलून फुटले आणि त्यामुळे कारचालक महिला व तिची लहान मुलगी किरकोळ जखमी होऊन बचावली. अपघात घडताच महामार्गावरून जाणाऱ्या वाहनस्वारांनी गाड्या थांबवत कारमध्ये अडकलेल्या माय-लेकीला बाहेर काढले व त्यांना रुग्णवाहिकेतून इस्पितळात दाखल केले.

या अपघातामुळे महामार्गावर वाहतूक कोडी झाली. वाहतूक पोलिस निरीक्षक मार्लन डिसोझा व त्यांचे सहकारी पोलिस तसेच रॉबर्ट जीपवरील पोलिसांनी वाहतूक सुरळीत केली. अपघाताचा पंचनामा म्हापसा पोलिस हवालदार उल्हास गावकर यांनी केला.