Mapusa: दुसऱ्यांदा स्वच्छतागृह तोडण्याचा प्रयत्न; जमिनीवर डोळा

म्हापसा : खोर्ली येथील प्रभाग १८ मधील वापरात असलेले जुने सार्वजनिक स्वच्छतागृह काही अज्ञात व्यक्तींकडून मोडण्याचा प्रयत्न दक्ष स्थानिक लोकांसह नगरसेवकाने रविवारी हाणून पाडला. शहरात मागील काही दोन महिन्यांतील ही दुसरी घटना आहे.

पालिकेच्या मालकी असलेल्या बांधकामावर अनधिकृतपणे हटवून जागा बळकावण्याचा प्रयत्न होतोय असे दिसते. पहिल्या प्रकरणात पालिकेने कुठलीही कारवाई केली नसल्यानेच अशा बेकायदा प्रकारांना प्रोत्साहन मिळते अशी चर्चा शहरात आता सुरू झाली आहे.

दरम्यान, दोन्ही घटना या रविवारी सुटीच्या दिवशी अमलात आणण्याचा प्रयत्न झाला आहे. उपलब्ध माहितीनुसार, रविवारी सकाळी ११.३० च्या सुमारास खोर्ली, कासारवाडा येथील सार्वजनिक स्वच्छतागृह हटविण्याचे काम कामगारवर्गाकडून सुरू होते.

याची खबर लागताच स्थानिक नगरसेवक अन्वी कोरगावकर, त्याचे पती अमेय कोरगावकर व रहिवासी घटनास्थळी दाखल झाले. त्यांनी कामगारांना तसेच कंत्राटदारास जाब विचारला, परंतु संबंधितांकडे समर्पक उत्तर नव्हते. लोकांचा वाढता विरोध आणि हस्तक्षेपानंतर कामगार व कंत्राटदाराने घटनास्थळावरून काढता पाय घेतला. त्यांनी कुणी पाठविले याचे उत्तर दिले नाही.

कारवाई होणे गरजेचे : कोरगावकर

याप्रकरणी स्थानिक नगरसेवक कोरगावकर यांनी सांगितले की, आज रविवारी आमच्या प्रभाग मधील वापरात असलेले जीर्ण सार्वजनिक स्वच्छतागृह मोडण्याचा प्रयत्न झाला. अनोळखी व्यक्तीने मजुरांच्या साहाय्याने ते जमीनदोस्त करण्याचा प्रयत्न केला पण आम्ही ते रोखले. याविषयी मुख्याधिकारी व नगराध्यक्ष यांनाही माहिती दिली. नगराध्यक्ष नूतन बिचोलकर यांनी घटनास्थळी येऊन पाहणी केली. या बेकायदा कृत्यामागे असलेल्या दोषींवर कारवाई होणे गरजेचे असून आम्ही पोलिस तक्रारीची मागणी करतो. हे शौचालय लोक वापरत होते, एकीकडे सरकार राज्य ओडीएफ मुक्त करते, मात्र काही बेजबाबदार व्यक्ती मूलभूत सुविधा हिसकावून घेण्याचा प्रयत्न करते. यापेक्षा दुसरे दुर्दैव नाही.

पहिल्या घटनेत कारवाई नाही !

अन्साभाट येथील प्रभाग १० मध्ये अशाचप्रकारे वापरात नसलेले जुने स्वच्छतागृह गेल्या जूनमध्ये जमीनदोस्त करण्यात आले. याप्रकरणी पालिकेने अद्याप कुठलीही कारवाई केलेली नाही. पालिकेने तेव्हाच कडक कारवाईचा बडगा उगारला असता, तर अशाप्रकारे दुसरी घटना घडली नसती. तसेच कुणाचेही धाडस झाले नसते, असे नागरिकांचे म्हणणे आहे.