पर्यटक लुबाडणुकीनंतर पोलिसांची मोहीम तीव्र

म्हापसा : चंदगडमधील पर्यटक युवकांना मारहाण करून त्यांची लुबाडणूक केल्याप्रकरणात म्हापसा पोलिसांनी मंगळवारी (31 मे) आणखीन तिघा संशयित महिलांना अटक केली आहे. या सर्वांना 14 दिवसांची न्यायालयीन कोठडी सुनावण्यात आली आहे.

म्हापसा पोलिसांच्या माहितीनुसार, या प्रकरणात पोलिसांनी तिघा महिला संशयितांना अटक केली असून, त्या सर्व नेपाळच्या रहिवासी आहेत. सदर मारहाण व लुबाडणुकीचा हा प्रकार 24 मे रोजी, म्हापसा येथील श्री बोडगेश्वर मंदिरानजीक रस्त्यावर घडला होता. यापूर्वी म्हापसा पोलिसांनी तिघा पुरुष संशयितांना अटक केली होती. ते सध्या पोलिस कोठडीत आहेत. या प्रकरणात या वरील तिघांही महिलांचा समावेश असल्याने पोलिसांना त्यांना अटक केली आहे.

या पिडीत युवक पर्यटकांचे काही नग्न व्हिडिओ करून त्यांना धमकी देण्यात आली होती. दरम्यान, हा प्रकार घडलेल्या त्या आस्थापनांच्या ब्यूटी पार्लरच्या मालकाने अटकपूर्व जामिनासाठी न्यायालयात अर्ज दाखल केला आहे. या संशयितांनी पिडीत 11 जणांच्या युवक गटाकडून 1 लाख रोख तसेच एक सोनसाखळी व अंगठी मिळून 1 लाख 80 हजारांचा मुद्देमाल लुटला होता. हा मुद्देमाल अद्याप पोलिसांना सापडलेला नाही आहे.

म्हापशात चंदगडमधील पर्यटक लुबाडणूक प्रकरणाचे गांभीर्य लक्षात घेत आता पोलिसांनी या बेकायदा टाऊट्स विरोधात कारवाई मोहीम सुरू केली आहे. पोलीस उपअधीक्षक जिबवा दळवी यांनी म्हापसा, हणजूण व कोलवाळ या तिन्ही पोलिस स्थानकांना त्यांच्या कार्यक्षेत्रातील बेकायदा दलाल, फेरीवाले व विक्रेत्यांच्या विरोधात कारवाई तीव्र करण्याचे निर्देश दिले होते. या आदेशानंतर हणजूण पोलिसांनी आतापर्यंत 10 जण, कोलवाळ पोलिस 3 व म्हापसा पोलिसांनी 7 जणांवर गुन्हा नोंद केला आहे. याशिवाय या भागांतील भाडेकरु पडताळणी मोहीम तीव्र केली आहे.