Mapusa Theft: नास्नोडकर ज्वेलर्स चोरी प्रकरणात पोलीसांना यश; चौघांच्या टोळीतील दोघे अल्पवयीन

Mapusa Jewellers Theft

म्हापसा: म्हापश्यात चंद्रमोहन नास्नोडकर यांच्या मालकीच्या नास्नोडकर ज्वेलर्समधून रविवारी (दि. 22 सप्टेंबर) कोट्यवधी रुपयांच्या वर सोन्याचांदीचे दागिने लंपास करण्यात आले होते. या चोरीच्या संदर्भात महत्वाचे धागे-दोरे हाती लागल्याने पोलिसांचे एक पथक तातडीने मुंबईला रवाना झाले.

या चोरट्यांचा छडा लावण्यात पोलिसांना यश मिळाले असून म्हापसा पोलिसांनी चौघांना अटक केली आणि यांमध्ये दोन अल्पवयीनांचा देखील समावेश आहे. संशयित आरोपींकडून पोलिसांनी 1 किलो सोने आणि 10 किलो चांदीचे दागिने हस्तगत केले आहेत. हे संशयित राजस्थानमधील असण्याची शक्यता असून त्यांना सिंधुदुर्गात अटक करण्यात आली.

रविवारी मध्यरात्री 12 ते 2 च्या दरम्यान ही चोरी झाली होती. या टोळीमधल्या तिघांनी दुकानामध्ये घुसुन चोरी केली तर चौथा माणूस बाहेरून कोणी येत नाहीये ना यावर नजर ठेऊन होता.

चोरी केल्यानंतर पसार झालेली ही टोळी श्री महारुद्र देवस्थानाजवळ एका हॉटेलच्या CCTV मध्ये टिपली गेली होती. या फुटेजच्या आधारे पोलिसांचा तपास सुरु झाला होता आणि तिसरे पथक मुंबईला रवाना होण्याआधी बोडगेश्वराच्या चरणी गाऱ्हाणे घालण्यात आले होते.