Mapusa Municipal Workers Strike : म्हापसा नगरपालिकेने संपात सहभागी झालेल्या कर्मचाऱ्यांवर कारवाईचा बडगा उगारला आहे. या प्रकरणी तीन कर्मचाऱ्यांना कारणे दाखवा नोटीस बजावली असून कुचेली प्रकल्पातील कचरावाहू ट्रकची नासधूस केल्याप्रकरणी अज्ञातांविरोधात गुन्हा दाखल केला आहे.
21 ऑक्टोबरला स्वतःच्या मागणीपत्राच्या पूर्तर्तेसाठी म्हापसा पालिकेच्या कर्मचाऱ्यांनी संप पुकारला होता. मात्र, त्याच दिवशी सायंकाळी कर्मचारी संघटनेच्या नेत्यांसोबत बैठक घेत संप स्थगित ठेवला. यानंतर आता पालिका मंडळाने संपातील कर्मचाऱ्यांवर कारवाईचे सत्र आरंभले आहे. कुचेली कचरा प्रकल्पाच्या आवारात पार्क केलेल्या कचरावाहू वाहनाची अज्ञातांकडून नासधूस करून सार्वजनिक मालमत्तेची मोडतोड केल्याची तक्रार पालिका मुख्याधिकाऱ्यांनी पोलिसांत दाखल केली आहे. याप्रकरणी म्हापसा पोलिसांनी गुन्हा नोंद केला आहे. तसेच कर्मचारी संघटनेच्या तीन पदाधिकाऱ्यांना कारणे दाखवा नोटीस बजावली आहे.
म्हापसा पालिकेचे कर्मचारी बेमुदत संपावर गेले होते. कर्मचाऱ्यांच्या विविध मागण्या पालिकेने पूर्ण न केल्यामुळे संपावर जात असल्याची माहिती कामगार संघटनेचे नेते केशव प्रभू यांनी दिली होती.
कामगारांच्या मागणीपत्रात, वैद्यकीय भत्ता हा 6 हजार रुपयांवरुन तो 8 हजार करावा. तसेच शस्त्रक्रिया आणि आजारपणात कर्मचारी किंवा त्यांच्या कुटूंबीयांना जीएमसीत उपचार मिळावा. जीएमसीत उपचार नसल्यास इतरत्र खासगी इस्पितळात उपचार द्यावेत. या वैद्यकीय खर्चाची जबाबदारी पालिकेने स्वीकारावी. त्याचप्रमाणे, कचरा, ध्वजारोहण, रेनवेअर भत्ता, हाऊसिंग योजना, कर्मचार्‍यांच्या मुलांसाठी शिष्यवृत्ती अशा एकूण 19 कलमी मागणी पत्राच्या पूर्ततेसाठी अखिल गोवा पालिका कर्मचारी संघटनेने म्हापसा पालिकेला नोटीस दिली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.