Mapusa Court Summons Arvind Kejriwal: म्हापसा न्यायालयाचे दिल्लीचे मुख्यमंत्री अरविंद केजरीवाल यांना समन्स

Mapusa Court Summons Arvind Kejriwal: म्हापसा न्यायालयाच्या वतीने आम आदमी पक्षाचे संयोजक अरविंद केजरीवाल समन्स बजावले आहे. गेल्या वर्षी विधानसभा निवडणुकीच्या काळात आम आदमी पक्षाच्या प्रचारावेळी स्टीकर्स लावून मालमत्तेचे विद्रुपीकरण केल्याप्रकरणी हे समन्स बजावण्यात आले आहे.

राजकीय सूडापोटी ही कारवाई होत असल्याने अरविंद केजरीवाल हजर राहणार नसल्याचे पक्षाचे गोवा प्रमुख ॲड. अमित पालेकर यांनी म्हटले आहे. तसेच, याप्रकरणी कायदेशीर तोडगा काढण्यासाठी प्रयत्न करणार असे पालेकरांनी म्हटले आहे.

दरम्यान, पेडणे पोलिसांनी याप्रकरणी एप्रिल महिन्यात देखील अरविंद केजरीवाल यांच्यासह ॲड. अमित पालेकर यांना समन्स बजावले होते.

विधानसभा निवडणुकीवेळी ‘आप’ने सरकारी तसेच काही खासगी मालमत्तांवर पक्षाचा प्रचार करण्यासाठी काढता न येणारे स्टीकर्स लावले होते.

या मालमत्ता विद्रुपीकरणाची केंद्रीय निवडणूक आयोगाने दखल घेतली होती. या प्रकरणानंतर सक्तवसुली संचालनालयाचे (ईडी) एक पथक गोव्यात आले होते. ‘ईडी’ने याबाबत पेडणे पोलिस स्थानकातही तक्रार दिली होती.