पणजी: गोव्‍याच्‍या मानकुराद आंब्‍याची चव हापूस आंब्‍यापेक्षाही वेगळी असल्‍याने मानकुराद प्रसिद्ध आहे. मानकुरादच्‍या लागवडीसाठी सरकारकडून प्रतिहेक्‍टर दोन लाख रुपयांचे अनुदान देण्‍यात येत आहे. परंतु, अजूनही मानकुरादच्‍या जुन्‍याच रोपांची लागवड शेतकऱ्यांकडून केली जात आहे. शेतकऱ्यांनी पुढील काळात नव्‍या रोपांची लागवड करून मानकुरादचे उत्पन्न वाढवावे. त्‍यासाठी सरकारकडून हवे ते सहकार्य मिळेल, अशी हमी मुख्‍यमंत्री डॉ. प्रमोद सावंत यांनी शुक्रवारी विधानसभा सभागृहात बोलताना दिली.
आमदार केदार नाईक यांनी प्रश्‍नोत्तराच्‍या तासाला याबाबतचा प्रश्‍न उपस्‍थित केला होता. गोव्‍याचा मानकुराद आंबा जगभर प्रसिद्ध असल्‍याने त्‍याची जास्‍तीत जास्‍त कलमे कृषी खात्‍याने शेतकऱ्यांसाठी उपलब्‍ध करून द्यावीत, रोपे लावण्‍यासाठी सबसीडी देण्‍यात यावी, कापणी यंत्राचा कालावधी वाढवावा, किटकनाशके गोव्‍यातच उपलब्‍ध करून देण्‍यात यावीत, अशा मागण्‍या आमदार नाईक यांनी केल्‍या होत्‍या.
कृषिमंत्री रवी नाईक यांनी, आमदार केदार नाईक यांच्‍या सर्व मागण्‍या मान्‍य करण्‍याची हमी दिली. तर, मुख्‍यमंत्री डॉ. प्रमोद सावंत यांनी मानकुराद आंब्‍याच्‍या कलमाच्‍या लागवडीसाठी सरकारकडून शेतकऱ्यांना प्रतिहेक्‍टर दोन लाख रुपयांची सबसीडी देण्‍यात येत आहे. अधिकाधिक शेतकऱ्यांनी या सबसीडीचा लाभ घ्‍यावा.
युवा शेतकऱ्यांनी मानकुरादची लागवड करण्‍यावर भर द्यावी, असे आवाहन केले. सोबतच राज्‍यातील शेतीचे क्षेत्र वाढवायचे असेल तर शेतकऱ्यांनी जमिनी राखून ठेवल्‍या पाहिजेत, असे त्‍यांनी नमूद केले. मानकुराद ‘जीआय’ मानांकन मिळण्‍याच्‍या अंतिम प्रक्रियेत असल्‍याचेही त्‍यांनी सांगितले.
फलोत्‍पादनात मोठी वाढ
गेल्‍या काही वर्षांत राज्‍यातील फलोत्‍पादनात मोठ्या प्रमाणात वाढ झाली आहे. यातून पैसा मिळत असल्‍याने अनेक शेतकरी फलोत्‍पादनाकडे वळत असल्‍यामुळे फलोत्‍पादनाच्‍या क्षेत्रातही वाढ झाल्‍याचे मुख्‍यमंत्री डॉ. प्रमोद सावंत यांनी आमदार नीलेश काब्राल यांच्‍या प्रश्‍नाला उत्तर देताना सांगितले.
कृषिमंत्र्यांचे आश्‍वासन
बाजारपेठांत नारळांची किंमत सर्वसामान्‍यांच्‍या आवाक्‍याबाहेर गेली आहे. त्‍यामुळे सरकारने नारळाची आधारभूत किंमत १५ रुपयांवरून वाढवावी, अशी मागणी आमदार जीत आरोलकर यांनी केली होती. त्‍यावर आरोलकर यांच्‍या मागणीचा विचार करू, असे आश्‍वासन मंत्री रवी नाईक यांनी दिले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.