Mandovi Bridge: मांडवी पुलावर 'नो एन्ट्री'! 11 जानेवारीला 'या' वेळेत नव्या आणि जुन्या पुलावरून वाहतूक पूर्णपणे बंद

पणजी: गोव्याची जीवनवाहिनी मानले जाणारे मांडवी नदीवरील दोन्ही पूल रविवारी, ११ जानेवारी २०२६ रोजी काही काळासाठी वाहतुकीसाठी बंद ठेवण्यात येणार आहेत. पुलाच्या देखभालीची पाहणी आणि तांत्रिक तपासणी करण्यासाठी उत्तर गोवा जिल्हा दंडाधिकाऱ्यांनी (District Magistrate) हा निर्णय घेतला आहे. या कालावधीत पुलावरील सर्व प्रकारच्या वाहनांच्या वाहतुकीवर निर्बंध लादण्यात आले आहेत.

मांडवी नदीवरील जुना आणि नवीन अशा दोन्ही पुलांच्या 'डेक लेव्हल'ची (पुल पृष्ठभागाची पातळी) मोजणी आणि नियमित तांत्रिक तपासणी करणे आवश्यक आहे. पुलाची मजबुती आणि प्रवाशांची सुरक्षा सुनिश्चित करण्यासाठी ही प्रक्रिया दरवर्षी पार पाडली जाते. प्रशासनाने दिलेल्या माहितीनुसार, या कामात कोणताही व्यत्यय येऊ नये आणि काम अचूकपणे पूर्ण व्हावे, यासाठी ही तात्पुरती वाहतूक बंदी लागू करण्यात आली आहे.

कधी आणि किती वेळ असेल वाहतूक बंदी?

प्रशासनाने जाहीर केलेल्या वेळापत्रकानुसार, पुलांचे काम दोन वेगवेगळ्या टप्प्यांत केले जाईल:

• नवीन मांडवी पूल: ११ जानेवारी (रविवार) रोजी सकाळी ६:०० ते ७:३० या वेळेत सर्व प्रकारच्या वाहतुकीसाठी बंद राहील.

• जुना मांडवी पूल: त्याच दिवशी सकाळी ७:३० ते ९:०० या वेळेत वाहतुकीसाठी बंद असेल.

सकाळी ९:०० नंतर दोन्ही पुलांवरील वाहतूक पुन्हा पूर्ववत करण्यात येईल.

नवीन मांडवी पूल बंद असताना, जुन्या मांडवी पुलावरून हलकी वाहतूक (दोन्ही बाजूंनी) सुरू ठेवण्यास परवानगी दिली जाईल, तर अवजड वाहतूक तिसऱ्या पुलावरून (अटल सेतू) वळवली जाईल.

जुना मांडवी पूल बंद असताना, नवीन मांडवी पूल (दोन्ही बाजूंनी) आणि तिसऱ्या पुलावरून (अटल सेतू) वाहतूक सुरू ठेवण्यास परवानगी दिली जाईल.