Sunburn Festival: 'संस्कृती बिघडत असल्याचे बोलणाऱ्यांनी जाणून घ्यावे की..', भाजप प्रवक्त्यांचे 'सनबर्न'बाबतचे मत वाचा

Protest Against Sunburn Festival 2024 Sadetod Nayak

पणजी: एकीकडे ‘सनबर्न’ची तिकीट विक्री सुरू झालेली आहे, तर दुसरीकडे पेडण्यात सनबर्न आयोजनावरून वाद कायम आहे. संकेतस्थळावर तिकीट विक्री सुरू होताच पेडणेवासीयांनी ‘सनबर्न नको’ची हाक दिली आहे. कोणत्याही स्थितीत आम्हाला हा ‘इडीएम’ नको. सरकारने हा महोत्सव लवकर रद्द करावा, अन्यथा आम्ही पेडण्यात जनआक्रोश आंदोलन उभे करणार आहोत, असा इशारा मांद्रेचे पंच अमित सावंत यांनी दिला आहे.

‘गोमन्तक टीव्ही’च्या ‘सडेतोड नायक’ कार्यक्रमात पेडणेवासीयांनी सनबर्न महोत्सव आयोजनाला जोरदार विरोध केला. सरकार पक्षाच्यावतीने भाजप प्रवक्ते सिद्धार्थ कुंकळकर यांनी बाजू मांडली, तर मांद्रेचे पंच अमित सावंत आणि पत्रकार किशोर नाईक गावकर यांनी पेडणेवासीयांची भूमिका स्पष्ट केली.

सिद्धार्थ कुंकळकर म्हणाले की, २००७ मध्ये राज्यात सनबर्न सुरू झाला होता. हा महोत्सव आता एक ‘ब्रँड’ बनला आहे. जे लोक सनबर्नमुळे संस्कृती बिघडत असल्याचे बोलतात त्यांनी प्रथम जाणून घ्यावे की सनबर्नचे पास १० हजार रुपयांपासून सुरू होतात. हे पास सामान्यांना परवडणारे नाहीत. त्यामुळे राज्यातील सामान्य जनता यामध्ये जाण्याचा प्रश्नच उद्‍भवत नाही.

पेडणेकरांची मतेही महत्त्वाची; सिद्धार्थ कुंकळकर

वैयक्तिकरित्या मला ‘सनबर्न’मधील कर्कश संगीत आवडत नाही. मी काही चित्रपटांची जुनी गाणी ऐकतो. प्रत्येकाची आवड ही वेगवेगळी असते. सरकार जर कुणालाही परवानगी देत असेल, तर ते नियमाच्या अखत्यारीतच असते हेही लक्षात घ्यायला हवे. पेडणेकरांचा विचार लक्षात घेऊनच सरकारने निर्णय घ्यावा, असे मला वाटते.

सरकारची भूमिका संभ्रमात टाकणारी

किशोर नाईक गावकर यांनी सांगितले की, सनबर्न पर्यटनासाठी एक महत्त्वाचा महोत्सव आहे हे मान्य, परंतु त्याची जागा नेहमीच चुकीची निवडली आहे. आधी तो किनारी भागात आयोजित होत होता आणि आता सनबर्न ग्रामीण भागात पोहोचला आहे. सरकारला सनबर्न हवे की नाही हे प्रथम सरकारने ठरवावे. सरकारची भूमिकाच लोकांना संभ्रमात टाकणारी आहे. सनबर्नचे आयोजन आम्ही धारगळसारख्या ग्रामीण भागात मान्यच करू शकत नाही.