Goa Crime: चार वर्षीय जुळ्या बहिणींवर लैंगिक अत्याचार; नराधमाला 20 वर्ष सक्तमजुरीची शिक्षा, 5 लाखांचा दंड

पणजी: अल्पवयीन जुळ्या बहिणींवर लैंगिक अत्याचार केल्याप्रकरणी ३९ वर्षीय व्यक्तीला २० वर्षे सक्तमजुरीची शिक्षा आणि पाच लाख रुपयांचा दंड ठोठावला आहे. पणजीतील बाल न्यायालयाने याबाबत निर्णय दिला आहे. एप्रिल २०१९ मध्ये ही अत्याचाराची घटना उघडकीस आली होती.

पणजीतील बाल न्यायालयाने देऊळवाडा पेडणे येथील ३९ वर्षीय व्यक्तीला २० वर्षाची शिक्षा सुनावली आहे. तसेच, पाच लाख रुपयांचा दंड ठोठावला आहे. दंड न दिल्यास पाच वर्षांची साधी शिक्षा दिली जाणार आहे. आरोपीने एप्रिल २०१९ मध्ये चार वर्षीय दोन जुळ्या बहिणींवर बलात्कार केला होता. या प्रकरणी निकाल देताना बाल न्यायालयाने आरोपीला वरील शिक्षा ठोठावली आहे.

या खटल्यात एकूण ११ साक्षीदारांची जबानी नोंदवण्यात आली. खटला सुरु असताना आरोपीने त्याला या प्रकरणात गोवण्यात आल्याचा आरोप केला. तक्रारदारने माझ्यासह माझ्या पत्नीविरोधात असलेल्या रागातून गुन्हा दाखल केल्याचे मत त्यांने मांडले होते.