Mallikarjun Temple Goa: श्री मल्लिकार्जुन देवस्थानात आज अवतार व कौलप्रसाद

Mallikarjun Temple Goa: श्रीस्थळ, काणकोण येथील श्री मल्लिकार्जुन देवस्थानच्या अवतारपुरुषाचा वार्षिक कौलोत्सव शनिवारी (ता.7) श्रीस्थळ येथे होणार आहे. गोवा व कर्नाटकातील महाजन, भाविक व अन्य या ठिकाणी उपस्थित राहून कौलप्रसादाचा लाभ घेतात.

श्री अवतारपुरुष देवाचा प्रसिद्ध कार्यक्रम शनिवारपासून सुरू होत आहे. देवाची तरंगे, भगत, गडे व संबंधीत सेवेकरी मंडळी आदल्या दिवशी रात्रौ आसाळी, खालवडे व मैथळ (भाटपाल) या तिन्ही घरवईवर (मठ) जमतील व प्रत्येक मेळास परंपरेनुसार शुद्धी, अलंकार, पूजाअर्चा करुन उपाहार अर्पण केला जाईल.

पहाटे प्रत्येक मेळाचा आपापल्या घरवईवर अवतार कौलप्रसाद होऊन श्रीस्थळ येथे प्रयाण करेल. सकाळी 11.30 च्या दरम्यान श्रीस्थळ येथे श्री मल्लाकार्जुन देवालयाच्या प्राकारात तिन्ही मेळ एकत्रित येऊन खळ्ळेवरील अवतार होईल व सर्व मानेली, महाजन व भाविकांना कौल प्रसाद दिला जाईल.

सर्वांनी शांतता पाळावी व शिस्तीत कौल घ्यावा, संध्याकाळी सहापर्यंत सर्व भाविकांनी मंदिरात उपस्थित राहून कौल व कृपाशिर्वााद घ्यावेत.

वर्षपद्धतीप्रमाणे काही दिवसांनी म्हाल वेळीप, म्हाल देसाई, खालवडेची घरवय, मैथळची घरवय येथे ‘तळया’ (देवाला अर्पण केलेले नारळ, तांदूळ इ.) स्वीकारुन श्री देव अवतारपुरुषाचा लवाजमा शिवेश्‍वर महालात (उत्तर कर्नाटक) आपले कुळावी व भक्तांना दर्शन देण्यासाठी पायी प्रयाण करतील.