Makar Sankranti 2026 : मकरसंक्रांतीच्या गोडव्यावर महागाईचे सावट! साहित्याचे दर वाढले; वाण खरेदीसाठी बाजारात लगबग

डिचोली: हिंदू संस्कृतीत अनन्यसाधारण महत्त्व असलेला मकरसंक्रांती सण तीन दिवसांवर आल्याने या सणाची लगबग सुरू झाली आहे. मकरसंक्रांती म्हणजे नववधूसह सुवासिनींचा उत्साह द्विगुणित करणारा सण होय. मकरसंक्रांतीपासून रथसप्तमी बहुतेक घरोघरी हळदीकुंकू साजरा करण्यात येतात. मकरसंक्रांतीच्या साहित्याने सध्या बाजार फुलला आहे.

तिळगुळ, तिळाचे लाडू आदी साहित्य बाजारात विक्रीस उपलब्ध झाले आहे. यंदा या सणावर किंचित महागाईचे सावट असून गेल्या वर्षीच्या तुलनेत साहित्यात किंचित दरवाढ झाली आहे.

हळदीकुंकूसाठी लागणाऱ्या साहित्याची सध्या बाजारात खरेदी सुरू झाली असून पुढील दोन दिवसात खरेदीला जोर येण्याची शक्यता आहे. नववर्षातील या पहिल्याच सणावर यंदा किंचित महागाईचे सावट आहे.

बहुतेक साहित्याचे दर १० ते १५ टक्क्यांनी वाढले आहे. प्रथमच हळदीकुंकू करणाऱ्या सुवासिनीनी वाण म्हणून सुगड, असनीचे दोर आदी पारंपरिक वस्तू द्याव्या लागतात. यंदा सुगड महाग झाले आहेत. तीळ महाग झाले आहेत.